Thingtlang team Lengpui an tlo

Nimin tlai Lammual inkhelah Lengpui chuan Durtlang North hnehin CT Group Cup CYMA Inter Branch Football Tournamnet 2015 semi final an lut. Lengpui hian semi final-ah Bawngkawn leh Armed Veng 'S' inkhel a chak zawk an hmachhawn ang.

Field sirah Lengpui fan-ten "Lengpui... Lengpui... Lengpui..." tin khuangte nen an team an au phur a, Lengpui hian 5-1 in Durtlang 'N' an sawp theih phah.

Aizawl khawpui pawn aṭanga YMA football champion awm chhun Lengpui hian first half-ah Lalremsanga leh Lalrempuia goal thun hmangin 2-0 in hma an hruai. Durtlang 'N' hian an tlar hnung phui lo bakah goalkeeper chetsual an tuar a tih theih ang.

Durtlang 'N' lam hian Jeremy Hmingthansanga hmangin goal khat thunin beiseina nei thar ve leh mah se, Lengpui tan first half a goal khungtute Remsanga leh Rempuia ten goal kat ve ve an thun belh bakah Lalfakmawia'n a khung bawk a, Lengpui an chak chiang hle.

Lengpui manager R. Thanngura chuan, "Kan inbuatsaih nasa a, kan thawhrim rah liau liau a ni e. Kan khawtlang kan ṭanrual bakah a bik takin kan player-te inlungrualna kha kan chak chhan chu a ni. Khawtlang mipuiten min ṭawiawm ṭha a, semi final-ah pawh a tam thei ang berin min ṭawiawm leh ngei ka beisei," tiin Vanglaini palai a hrilh.

Durtlang N hian an kalkawngah Ramhlun South hnehin mipui beisei phak bakin an thleng sang a, naupang te te hmabak nei êng tak an ni. Lengpui an fakawm a, football thiam khua an la ni zel e.