CYMAFootball Dinthar-in BVT an hneh

Dinthar Veng chuan Bethlehem Vengthang hnehin CT Group Cup CYMA Football Tournament semi final an lut. Tun hnaiah veng leh veng inelnaah beisei pha lo deuh ṭhin mah se tunah chuan Dinthar tak tak kan hmu leh ṭan ta.

Ningani zan inkhelah MPL club awmna veng pahnih Dinthar leh BVT te hun pangngaiah 1-1 in an inhnehtawk a, penalty shootout-ah 4-1 in Dinthar an chak. Dinthar hian semifinal-ah champion lai Armed Veng an hmachhawn ang.

BVT hian inhliam vangin defender Laldin-sanga an chhawr theih loh bak­ah player ṭha K Lalṭha­thanga leh Zohma­ngaiha-te chu inhliam vangin an khel tluan thei lo a, minute 58-naa Lalzatluanga hmanga an hmahruaina chu an hmang ṭangkai zo lo.

BVT defender Zo-hma­ngaiha'n minute 15 chauh a awm tawh tihin penalty a chawi a, Dinthar defen­der C Lalnunsanga a rawn ding chuakin MPL1-a FC RS Annexe captain hian goal-ah a chantir. Goal dang a luh belh lo a, penalty shootout-ah Dinthar an vannei zawk.

BVT hi a khelah an chungnung zawk a, goal-a an hriam tawk lo an tuar a, team ṭha tak ni si semi final thleng loin an tla.

Bethlehem VT ma­na­ger Lalrinfela chuan, "Kan vanduai a, kan khelh ṭhat ni a ni chungin Din­thar kha kan keini aiin an khel ṭha zawk a ni. Player pawimawh inhliam an awm nual kha kan chak lohna chhan pakhat chu a ni. Veng mipuite min ṭawiawmnaah lawmthu ka sawi a, Dinthar kha an kal leh zelna turah duhsak­na ka hlan e," tiin a sawi.

Dinthar manager Lalthlengliana chuan, "An chakna lai ber an winger-te kan dang chat thei a, kan game plan hlawhtlin zarah team ṭha tak kan hneh thei a ni. Referee khan a tih tur dik tak a tih avangin penalty kan hmu a, kan goal phurh sutna hun ṭha kan hlawhchhuak kha kan vanneihna inṭan­na a ni," a ti.