El Clasico Nou Camp-ah team talbuai Real an leng dawn

Football khawvela inkhel ngaihven hlawh ber pawla chhal ṭhin chu El Clasico a ni a, zanin dar 7:30-ah he inkhel hi hmuh tur a awm dawn. 

Team indinthar tum Barcelona khelmualah Real Madrid an lenglut dawn a, team pahnih hi tun hnaiah an talbuai fo avangin inkhel en châkawmna a belhchhah. 

Barcelona-in Lionel Messi an la chelh hram hram a, Real Madrid-in an chhuanvawr ni ṭhin Cristiano Ronaldo an nei tawh lo thung.

Madrid khaw club hian Ronaldo boruak ang nei phak player dang an kawl ta rih lo a, hei vang hian Messi vs Ronaldo a nih tel ṭhin lai ai chuan a boruak erawh a nem deuh niin a lang.

El Clasico khelh hmaa Real an chak zo lo hi Barcelona tan chuan chanchin lawmawm a tling a, Zinedine Zidane-a enkawl team hi an match hnuhnung pahnihah an tlawm ve ve. 

Real hian La Liga-a an match hnuhnung berah kai thar Cadiz chu 1-0 in an ngam lo a, mahni muala khel an ni - Champions League-ah Shakhtar Donetsk an mikhual zui a, 3-2 in an tlawm zui. 

Inkhel hnuhnung pahniha tlawm chunga Barcelona lenchilh hi thil huphurhawm a tling ang tih a chiang a, hetihrual hian Zidane chuan hahdam taka inkhel an hmachhawn tur thu a sawi thung. 

French coach chuan, "Mipuiin eng nge an sawi ka ngaihtuah lo. Inrinni zan dar 7:30-ah inkhel turin kan inlan ang a, hahdam takin kan khel ang," a ti a, pressure a awm loh thu a sawi - coach a nih hnua Nou Camp vawi nga a tlawh tawhah Zidane hi a la tlawm miah lo. 

Real-in season hmasaah La Liga nomawi an chawi a, an champion theih chhan erawh Zidane-a thluak ṭhat bik vang ni loin an elpui Barcelona leh Atletico Madrid an talbuai ve tho vang a ni. 

Hei hi hre chungin Real-in nipui transfer-ah player lakluh an nei lo a, Zidane-a'n squad a chhah lutukah ngaiin a chhawr duh loh Dani Ceballos, James Rodriguez leh Gareth Bale-te a chhuahtir vek. 

Tlarhnungah Sergio Ramos a awm loh chuan an talbuai chhun-zawm zel a, Marcelo-a'n uaithlak lam a pan ve ta tih a lang bawk. Tlarhmaah lah kum 32 mi Karim Benzema chu innghahna a la ni.

Chelsea aṭanga lakluh Eden Hazard lah fitness mumal lo vangin beisei a phak hleithei lo a, Zidane-a'n Luka Jovic, Eder Militao leh Vinicius Jr-te rin tum viau mah se midang thlazar hnuaia khel chi chauh an niin a lang. 

Real buaina zawng zawng ziak dawn i la, a bua siam tham hial a ni ang - mahse heti taka an buai chung hian Zidane chuan an harsatna chu a chinfel theih tur thu a sawi!

French manager chuan, "He buaina chingfel thei tur hian theihna ka neiah ka ngai a, chuvang chuan kan buaina hi chinfel ka tum dawn a ni. Ka player-te pawhin harsatna kan hmachhawn mek hi sutkian tumin an bei dawn. 

"Buaina chinfel theihna tur kan zawng dawn a, kan chingfel bawk ang," a ti a, a inringtawk hle. Real player zingah Hazard, Dani Carvajal, Martin Odegaard, Mariano Diaz leh Alvaro Odriozola-te chu hliam vangin an inlan thei dawn lo chiang. 

Hetihrual hian Sergio Ramos erawh El Clasico khel thei tura rawn kir tura beisei a ni a, Ningania mahnia training nei defender hi a awm chuan Real player-te rilru puthmang a danglam ang. 

Real buaina kan sawi vul chuk a, Barca buaina hi sawi bo theih a ni bik lo - mahse, Catalan club erawhin Champions League-ah 5-1 ngawta Ferencvaros an sawp avangin Real ai chuan an boruak a ṭha. 

Chutihrual chuan La Liga-a an match hnuhnung berah chuan Barca hi an chak zo bik lo a, khualmualah Getafe chu 1-0 in an ngam lo - Real lakah an tlawm a nih ngat chuan fan-ten club board lam hawiin president Josep Maria Bartomeu ban an phut leh ang. 

Hei hian club chhungkuaah nasa zawkin buaina a siam zui bawk ang tih a chiang a, a tawi fel thei ang bera sawi chuan Barca-in buai lehzualna pumpelh turin zaninah chak ngei ngei an mamawh. 

Real laka hnehna chang tur chuan Barcelona tan Ferencvaros laka penalty khungtu Messi chet ṭhat a pawimawh a, "Messi a chet ṭhat chuan Barcelona an khel ṭha ṭhin," tiin an sawi ṭhin. 

Mi tam takin El Clasico an en châk chhan zawt ila, a chhan lian takah Messi a la tel reng ang - mahse kum 33 mi forward hian tun season-ah goal hnih chauh a la khung a, penalty aṭang ve vein a ni. 

Getafe laka an tlawm ṭumin coach Ronald Koeman-a'n Messi ṭha zawk a hmuh theih a beisei thu a sawi a, Argentine forward hian Ferencvaros lakah a theihna pholangin Barca-in goal nga an khung theih nana inkhel khaidingtu a ni a, Koeman-a'n a duh tak a hmu. 

Messi goal khung theihzia hrilh nawn kan ngai lo a, Madrid lakah pawh Argentine forward hi a inthlahrung ngai lo - inelna hrang hrangah Real hi vawi 38 a hmachhawn tawh a, goal 26 ngawt a khung thei!

Tun season-ah penalty aṭang chauhin goal la khung mah se Real tan Messi zuam ngawt chu thil atthlak tak a ni ang tih a chiang a, Messi awm vang chauh pawhin Barcelona hi zaninah chak tura rinkai zawk an ni. 

Barcelona number 1 goalkeeper Marc-Andre ter Stegen chu khup hliam vangin a la chawl mek a, a hmun ruakah Neto chuan Barca goal venhim hna a thawk leh ang. 

Khup hliam vang thoin Samuel Umtiti chu a inlan theih a la rinawm chuang loh a, Jordi Alba-a'n team training a zawm tawh avangin Koeman-a'n a duh chuan a chhawr thei ang - Sergino Dest a awm tho avangin Alba hi dam chiang lo pawh ni buaina tur a awm lo niin a lang. 

Sergio Busquets chu midfield luah leh thei tawh tura beisei a ni a, Antoine Griezmann-a'n bench lamah hun a hmang a nih pawhin a mak lo ang - French forward hi Koeman-a'n rin tum viau mah se beisei angin a la khel chhuak lo. 

Champions League-ah Koeman-a'n Griezmann aiin kum 20 mi Francisco Trincao rin a thlang zawk a, Portuguese forward hian a khelh ṭhat avangin El Clasico-ah bul a ṭan a nih pawhin mak ti suh. 

El Clasico hmain Barce-lona-in an player paliin contract thar an ziah thu an puang a, Gerard Pique, Marc-Andre ter Stegen, Clement Lenglet leh Frenkie de Jong-te chuan Catalan club tan hian rinawmna thu an tiam. 

Kum 33 mi Pique-a'n June 2024 thleng khel turin contract thar a ziak a, mahse a contract sei zawng hi 2021/22 season aṭang chuan a khelh tam danah a innghat ang - Barca tan a khel hnem tawk a, a contract a hmang zo a nih chuan kum 37 mi a ni hman dawn tihna a ni. 

Kum 28 mi Ter Stegen-a'n June 2025 thleng khel turin contract a ziak a, a release clause hi euro maktaduai 500 zet a tling - Pique pawhin release clause a contract-ah a ziak tel a, euro maktaduai 500 tho a tling.

Lenglet leh De Jong-ten 2026 thleng khel turin contract an ziak a, kum 25 mi defender Lenglet hi a lei duh an awm a nih chuan euro maktaduai 300 insen an huam a ngai dawn. 

De Jong-a buy-out clause hi euro maktaduai 400 a ni thung a, kum 23 mi lek a la nih avangin Dutch midfielder hian a contract-a hman zawh hunah pawh tun ang renga a khelh theih chuan club lian tam tak chil a la ti put ang.