Nick Fradiani American Idol thar

Nilaini zan khan American Idol season 14-naa Idol thar puan chhuah a ni ta a, Nick Fradiani chu American Idol season 14 atan thlan a ni.

Thawhlehni zan khan an intihsiak a, hemi zana an intihsiakna result hi Nilaini zan khan puan chhuah a ni ta a ni.Head to head-ah Nick Fradiani hi a che ṭha zawk a, American Idol thar atan an thlang a, American Idol hnuhnung ber dawttu a ni dawn ta a ni. Nakkum bak American Idol hi neih a ni tawh lo ang.
Grand Finale-ah hian judge te an zai a, a pui a, entuten hmuhnawm an ti a, thiam an ti. Judge pathum - Keith Urban, Jennifer Lopez leh Harry Cornick Jr. te hian Rihanna hla hit 'Diamond' leh Bruno Mars hla hit 'Locked out of heaven' an rawn medley a, an thiam a, an zawm nalh viau. Hei bakah hian show-ah hian Janelle Monae, Ricky Martin leh Jamie Foxx ten an hla thar an rawn sa a, judge hlui, Steven Tyler, Nile Rodgers leh Chic, Pitbull leh Chris Brown, Vance Joy, Echosmith, New Kids on the Block leh Michael McDonald te an zai bawk.
Nick Fradiani hi New York-a audition an neih aṭanga tling chho a ni a, amah hi kum 29 mi niin, Guilford, Connecticut-a mi a ni. Nick hi zaia intihsiakna lamah hian mi thar a ni lo a, a hma aṭangin inelnaah a lo tel fo tawh a, chung zinga kan hriat langsar chu America's Got Talent a ni. He intihsiakah hian a band, Beach Avenue chu an tel.
Beach Avenue hi kum 2011 khan Nick Fradiani te hian an din a, BBattle of the Bands intihsiakah pakhatna an lo ni tawh. An band hi hmun hrang hrangah an lo perform tawh ṭhin a, band lar tak tak concert-ah opener an lo ni tawh ṭhin a ni. Third Eye Blind, STYX leh The Alternate Routes te concert-a an open chu fak a hlawh hle nghe nghe. An band hian blues music an play ṭhin.
Kum 3 mi chauh a nih aṭangin tih tak takin a zai ṭan tawh a, a pa pawh hi musician tho a ni a, pawl 4 a nih aṭangin mipui hmaah a zai tawh a ni. Zaithiamah chuan John Mayer, Justin Timberlake leh Rob Thomas ten an influence nasa hle. OneRepublic-a mi Ryan Tedder-a kawng zawh ang hi music khawvelah chuan a zawh chak ber a ni a, amah nih a châk a ni ber mai. American Idol hlui Phillip Phillips pawh a ngaisang hle.
Pahnih Clark Beckham hi Kristian ṭha tak a ni. Kum 8 mi a nih aṭangin a zai ṭan a, an zaina hmasa ber pawh a nu leh a pa nen, an pathumin biak inah hla an rem a ni. Ryan Tedder, John Mayer, Stevie Wonder, Keith Urban, Jon Bellion, Allen Stone, Jonny Lang, John Legend, Dave Barnes, Johnny Swim teho hi a duh hle. Tunah hian Tennessee-ah a khawsa mek a, an kohhranah worship leader a ni. Runner Up a ni tih a hriat ve leh, 'Pakhatna a ni ta a, ka lawm hle a ni. Eng pawh nise, kei pawh hian champion rilru ka pu ve tho mai,' tia sawiin, 'Kan hmalam hun hian eng nge a ken ka hre lo a, mahse kan hmalam hun kengtu erawh ka hria,' tiin Pathiana a innghahzia a tarlang bawk.