Ronaldo a la dam rih lo

Cristiano Ronaldo chu coronavirus lak aṭangin a la fihlim lo, hri a kai avang hian Pathianni zana Juventus leh Hellas Verona inkhelh hunah a tel theih a rinawm loh. Karleh a Barcelona nen Champions League an khelh hunah pawh a inlan thei lo dinhmunah a ding.

Ronaldo hian an ram Portugal tana Nations League a khelhna lamah hri leng hi a kai, October 13 khan a kai tih hriat a ni. Hri kai chungin Turin khawpuia a chennah a kal a, Ningani hian a dinhmun endik leh niin hri hi a la vei.

UEFA inkaihhruaina danah chuan inkhelh ṭan hma aṭanga darkar 24 chhungin Covid-19 an kai lo a ni tih fianfiahna a awm chuan squad-ah telh theih an ni a, hetiang a nih chuan Ronaldo tan Barca hmachhawn theihna kawng a la inhawng.

Kum 35 mi forward hian natna a nei hran lo a, a chenna inah mimal training a nei reng tho - Juve manager Andre Pirlo tan pawh a dam hun huna chhawr theih a ni ang, chutih rualin team training erawh a zawm mai thei dawn rih lo.

Ronaldo chuan, "Hlawh-tlinna hi kan thil dawna teh chi a ni lo, eng tiangin nge harsatna kan paltlang tih hi a ni zawk," tiin social media lamah a tarlang, mimal training a neih ṭhat miau avangin hri laka a fihlim hun hunah coach tan pawh chhawr theih a ni ang.