Pliskova hnehtu Kudermetova

Tennis inelna Ostrava Open khelh laiah champion tura rinkai Karolina Pliskova a chak lo, seeded pahnihna Pliskova hi Veronika Kudermetova chuan 4-6, 6-4, 6-3 a hnehin quarterfinal a in vaw kai.

Ningani zan inkhelah Czech Republic nula hi a tirah chuan a che fuh zawk, harsa lutuk loin set khatna a la. Set hnuhnung pahnihah erawh player langsar lo, qualifier aṭanga in vaw tling hram Kudermetova a chungnung.

Russian nula Kudermetova hian a match lehpekah chuan Jennifer Brady a hmachhawn ang. American player hian a khingpui Daria Kasatkina chu 7-5, 6-2 in a lo hneh ve thung a ni.

Inkhel dangah seeded pathumna Aryna Sabalenka chuan chiang taka set hmasa a hloh hnuah tleirawl Coco Gauff chu 1-6, 7-5, 7-6 (2) in a hneh hram. Player pahnih hi August thla khan Lexington-ah lo intawng tawhin Gauff a chak, tunah erawh result a inthlak ta.