January-ah I League khel dawn

India rama league sang ber dawttu ni ta I League chu January 7, 2021 aṭanga khelh ṭan turin ruahmanna thar siam a ni. 

Ningani tlai khan AIFF Executive Committee member-te chuan video conferencing hmangin meeting an nei a, I League ṭan hun hi an rel fel a ni.

AIFF chuan kuminah hian inelna kalpui hman tum mah se West Bengal sorkar nen inbiak rawnna an neih hnuin January-a sawn mai hi an rilruk ta zawk a, nakkum hma chuan I League inkhel en tur kan nei dawn lo. 

Tun season I League-ah hian team 11 an khel dawn a, Hero I League qualifier champion Mohammedan Sporting Club chuan kum sarih hnua a vawi khat nan inelna hi an hmachhawn dawn a, Sudeva FC chuan sum hmanga hmun ruak pakhat awm chu leiin an khel dawn bawk. 

Anni pahnih bakah hian  Aizawl FC, Real Kashmir FC, Punjab FC, Chennai City FC, Gokulam Kerala, Churchill Brothers, Indian Arrows, Neroca leh Trau FC chuan inelna hi an hmachhawn dawn. 

Covid-19 vangin inelna hi tihtawi a ni dawn a, club tinte vawi hnih ṭheuh an inhmachhawn kual dawn lo - inelna hi stage hnihah ṭhen a ni dawn. 

Inelnaah hian match 80 khelh a ni dawn a, first phase-ah club 11-te hi vawi khat ṭheuh chauh an inkhel kual ang. First phase-a a tiṭha zual panga chu group khatah dah an ni ang a, an inkhel kual leh ang a, champion tur an zawng ang. 

Parukna hnuai lam zawng chu group dangah dah an ni leh ang a, anni hi relegate tur zawngin vawi khat ṭheuh an inkhel kual leh dawn bawk a ni.