Inkhel hmuhnawmah chak zawk an awm lo; Chelsea leh an mikhual Arsenal inhnehtawk

Premier League inkhel hmuhnawm bik en tur a awm fo a, chung ho zingah chuan Pathianni zana Chelsea leh Arsenal inkhel pawh kha chhiar tel theih a ni ang. London Derby-ah chak zawk an awm lo, 1-1 a inhnehtawkin point khat ve ve an hmu.

Mikhual Arsenal lamin goal an nei hmasa zawk, forward Gabriel Martinelli-a khung chu Pedro Neto-a'n a sut a, team pahnihten chak turin goal khung theihna remchang an hmu a, mahse goal khat bak an khung thei lo.

English football inelna sang berah Chelsea hian match 11 aṭanga point 19 hmuin pathumna an ni a, khelh zat inangah Arsenal nen an point hmuh an inzat. Mahse, Blues hian goal difference an nei ṭha zawk a, a chungah an awm.

'A' team ve ve!

Mikel Arteta-a'n a palyer neih ṭhat ho a chhawr thei tawh a, tlarhnungah William Saliba, Gabriel, Ben White leh Jurrien Timber te an ding tlar a, si ban ngahaktu chu EPL golden glove kawl lai David Raya a ni bawk.

Captain Martin Odegaard a lo kir a, a tir aṭangin a inkhel thei. Bukayo Saka leh Gabriel Martinelli ten tlarhma lamah Kai Havertz an karcheh a, midfield laiah Declan Rice leh Thomas Partey an ding dun thei bawk, tuna an neih ṭhat ho an ni.

Enzo Maresca pawhin sa huai a ser thei. Chelsea hian player an ngah a, league leh European football lamah a hran deuh hlawkin an inthlak kual thei. Europa Conference League an khelh hnuhnung berah pawh khan BBC chuan "Chelsea B Team" tiin a ziak.

Arsenal lakah erawh Cole Palmer leh Nicolas Jackson ten bul an ṭan a, a sirah Neto awmin player man tam Moises Caicedo chu midfield khaikhawm tura zalenna zau tak pek a ni a, a thiamna bakah tharum hmangin Gunners a hmachhawn.

An inkhel ta

Veikhawr Cole Palmer-a'n hla deuh tak aṭangin a 'shot' nghal pawp a, goalkeeper Raya tan hna hautak a siamsak nghal - mahse Arsenal si ban nghaktu hian a lo dang hman a, sang taka zuangin a nem per.

Midfield thununtu zawk nih tumin an inel - Odegaard pawh damkawr a ni tih hriat miah lohin a tlan kual ngar ngar a, a ke aṭangin ball hlauhawm pawh a chhuak fo, goal an neih theih chhan pawh a ni.

Odegaard-a ball pek hi Martinelli chuan a chang fuh a, goal khung nan angle zim deuh tak ni tawh mah se Brazilian forward hian keeper Robert Sanchez-a ven loh lai awmchhunah a khung hmak.

North London club lawm chhung erawh a rei bik lo, goal an neih aṭanga minute 10 hnuah an chhuah ve leh nghal. Portuguese winger hian Enzo Fernandez-a ball pek chu hla duh tak aṭangin a khung, goal kilah tak a pet avangin Raya tan dan phak a ni lo.

Pedro goal khung dawnah Partey chuan a ven tura ngaih hi a hnaih tawk lo a, hmun awl a pe zauh - beisei anga season hmang rih lo Rice chuan a um na tawk lo bawk, an phu ang ngeiin Blues lamin an sut tia sawi theih a ni bawk.

An dinhmun

Liverpool an chak tih hresa chungin Arsenal hi an inlan a, an tan tlawm kha a rem lo - Premier League hmahruaitu nen an inkarah point kua a awm der tawh a, thlasik boruak vawh tak tak hmain champion beiseina a thamral thut thei a ni tlat.

Season hmasa angin Arsenal game a nghet tawk lo deuh, hliam dam hlim Rice leh Partey inkawpin goal an nawr na tawk lo a, Spanish midfielder Mikel Merino luh chinah nawr na deuh mah se a hmawr bawktu an la nei ṭha lo.

Gunners tan champion tur chuan goal khung thei player neih a ngai, striker atana chher chawp Havertz ho chuan nomawi chawi a harsa dawn niin a lang. Blues pawh team indinthar an nihna a lang a, an elpui laka point an hmu kha lawm tur an ni.

Nipui bazar lai khan fiamthu thawh nan an hmang ṭhin, mahse Italian manager Maresca-a'n khelhtir duh dan nghet tak a nei tih kan hmu chho zel a, theihna nei sang tak tak an kawl hnem miau avangin champion tum ngam zingah an awm.