Messi awmna Miami an tla

Lionel Messi-a'n goal khung mah se awmzia a nei phak lo a, a khelh mekna Inter Miami chu Major League Soccer playoff aṭangin an tla, an khingpui Atlanta United lakah 3-2 in an tlawm a ni.

Playoff hi best of three hmanga khelh niin, team pahnihte hi vawi khat ve ve an chak tawh hnuah Pathianni khan an intawng, inkhel pawimawhah Messi leh a ṭhiante an che fuh ta lo.

Inter Miami hian league match an khel ṭha thei hle a, point 74 hmuin Eastern Conference team zinga a chungnung ber an nih bakah point hmu tam record an siam hial, mahse an result duhawm hi playoff lamah an chhawm nung thei ta lo a ni.

Supporters' Shield latu Miami tan Matias Rojas chuan goal hmasa ber a khung a, mahse Atlanta lamin Jamal Thiare-a goal hnih hmangin an chhang let - Messi chuan sut ve leh mah se a hun tawp dawn lamah Bortosz Sliscz chuan Atlanta chakna goal a khung.

Thla hmasa khan Inter Miami hian Supporters' Shield an lo la tawh a, hemi ṭum hian FIFA president Gianni Infantino chuan Miami hi FIFA Club World Cup khel tura an tlin thu a lo puang tawh a ni.

Atlanta hian semifinal-ah chuan Orlando City an tum dawn a, New York City leh New York Red Bulls ten final luh an inchuh thung a, semifinal hi chu match khat hmanga chinfel nghal tawh tur a ni ang.