Bruno Fernandes kha a lo kir leh ta

Goal khung thei, assist nei thei bawk si ball pass thiam leh ṭangkai kha a ni ṭhin a, mahse hun eng emaw ti chhung chu a bo - tunah erawh Bruno Fernandes kha a nihna nen a lo kir leh ta.

Manchester United captain hian Pathianni zan khan a team hi Leicester City lakah 3-0 in a chakpui - Portuguese midfielder hian goal hmahruai a khung bakah a hnuhnung pahnihah a inrawlh ve ve bawk.

Goal thum chu

Erik ten Hag a chhuak a, a hmun ruak luah lailawktu Ruud van Nistelrooy hoin Old Trafford-ah mikhual an lo thleng a, coach thar Ruben Amorim lo thlen hmaa an match hnuhnung ber a ni tel nghal bawk.

A tir aṭangin Man United an hmuhnawm, goal pawh an nei har lo. Fernandes chuan Amad Diallo-a ball pek chu box hrul aṭangin a khung, player tam zawk chuan goal lamah an la pet kher lo ang, mahse a khung thei tlat.

Chawlhlawk hmain goal hnihna pawh kan hmu, awm hmun thlang dik Fernandes chuan ball tauh fuh chiah lo mah se a malpuiin a tiper a, ball per hi Foxes defender Victor Kristiansen chuan anmahni lamah a tilut palh a, chak tur a chiang tiin a sawi ngam.

Second half-ah pawh thil a danglam tam lo, forward Alejandro Garnacho chuan an goal thumna a khung, a siamsaktu chu Fernandes tho a ni a, an goal pathum chu a kut chhuak vek tia sawi theih a ni.

United thar

Manager chhuak ta Erik ten Hag enkawlna hnuaiah Foxes aiin Ruud van Nistelrooy hoin Man United player an phur zawk niin a lang a, chak tumin an inkhel - ball chan châkin a tlan kual tam a, ṭhiante an inpui ṭha bawk.

Player a nih lai Man United striker ṭha hian manager lailawk ni chungin match li a kaihruai hman a, tlawm an nei miah lo - vawi thum chakin ṭum khat chu Chelsea nen an inhnehtawk thung a ni.

Inkhel a zo a, khelmual a chhuahsan dawnah Man United ṭantute chuan Nistelrooy hi kut bengin an thlah a, an coach thar tur Amorim nen thawk dun zel tura duhtu pawh an tam ngeiin a rinawm.

Mahse, nimin tlai thleng kha chuan Nistelrooy hma hun hi a la chiang lo - kar hmasa khan a awm zel dan tur a sawi chian theih loh thu a sawi tawh a, club thuneitu lam nen tun kar chhoah an inbia ang.

Thukhawchang

Manchester Uniyed manager lailawk Ruud van Nistelrooy chuan, "Goal hnih ṭha tak kan khung a, Foxes lamin anmahni lama an tihluh chhan pawh na taka goal kan nawr vang a ni tel bawk.

"Ka naute khan chak an duh a, khelmual chhungah theihtawp tak meuh an chhuah lai hmuh kha a nuam ka ti. Tlarhma lamin fak an phu, chutihrualin a hnung lam inven dan pawh kan hmuh hmaih lo," a ti a, goalkeeper Andre Onana a fak bawk.

Tun kar tawpah international break a awm dawn a, manager thar Amorim-a'n a match hmasa ber hmain chawlhkar hnih chhung chu a naute a hrual hman dawn, mahse ram tana feh chhuakte an tel rih lo ang.

Portuguese manager Amorin hian Sporting Lisbon tan season duhawm a hmang mek, a club chhuahsan tak Sporting hi tun season chhungin league match 11 a khelhpui tawhah a chak vek a, a boruak ṭha tak hi Premier League lamah chhawm ngei a tum dawn a ni.