Ka mawhphurhna a ni - Postecoglou

Pathianni zan Premier League inkhelah Tottenham Hotspur chu Ipswich Town lakah 2-1 in an chak lo a, an result ngelnghet lo thei tak mai chu Spurs manager Ange Postecoglou chuan ama mawhphurhna a ni tih a sawi.

Tottenham Hotspur Stadium-a inkhelah mikhual Ipswich lamin Sam Szmodics leh Liam Delap te hmangin chawlhlawk hmain goal an khung a, kai thar lakah North London club chu nasa taka mualpho thei dinhmunah an ding.

Striker Dominic Solanke-a goal khung chu offside vanga hnawlsak a ni a, second half-ah Rodrigo Bentancur chuan Pedro Porro-a corner pet chu tauh lutin beiseina siam thar leh mah se, goal dang an neih theih loh avangin awmzia a nei phak lo.

Spurrs manager Postecoglou chuan, "Match ṭhenkhatah chuan ṭha taka khelin kan phu ang ngeiin point thum pawh kan hmu ṭhin, ṭhenkhatah erawh mak tak maiin kan nghet lo leh em em thung.

"Kan khelh dan a ngelnghet thei lo a, khelh ṭhat leh ṭhat loh kar a hla ṭhin lutuk hi ka thiam loh a ni a, ka mawhphurhna a ni bawk, siamṭha turin theihtawp ka chhuah dawn a ni," tiin a sawi.

Tun season Premier League match 11 aṭangin Spurs hi vawi nga ngawt an tlawm ta, league nomawi chu an chawi dawn lo tiin a sawi ngam leh ta phawt - League Cup lamah erawh quarterfinal an thleng tawh thung.

Austrian manager Postecoglou hian ram leh club a enkawl tawh ṭhin ho chu a season hnihnaah nomawi a chawipui ṭhin - Tottenham tan a season hnihna a hmang mek, League Cup bakah Europa League an la beisei thei a ni.

Inkhel dangah Newcastle United erawh an chak - Magpies hian Nottingham Forest lakah goal chhuah hmasa mah se goal thumin an chhanglet a, inkhel a tawp meuh chuan 3-1 a chakin point thum hlu tak an hlawh chhuak.