Roma-in coach an ban

Serie A club AS Roma chuan head coach Ivan Juric an ban a, tun season-a an coach pathumna tur an zawng mek - Italian club hian Juric hma hian an coach Daniele de Rossi chu an lo ban tawh a, Juric hian September 18 aṭang khan enkawl ṭan ve chauhin, tunah an inban leh ta.

AS Roma hian Pathianni zan khan an mikhual Bologna chu league match-ah 3-2 in an ngam lo a, coach Juric-a'n a tuar zui - an tlawm hnu rei lotêah an ban a, kum 49 mi coach hian match 12 bak a team hi a kaihruai hman lo.

Torino leh Hellas Verona pawh lo kaihruai tawh coach hian match li a team hi a chakpui ve a, vawi nga tlawmin, vawi thum draw a neihpui - club neituten an coach ni zui zel turin a result hi ṭha tawk loah an ngai a, an ban ta.

Roma hian season hmasa khan coach langsar leh chanchin ngah tak Jose Mourinho an ban a, Portuguese coach an ban hnuah an club legend Daniele de Rossi an la lut. Italy international hlui hnuaiah result an nei ṭha viau a, season tawp thleng atan chauha contract an ziahpui hi kum 2027 thleng atan an chelh.

Mahse, tun season-ah beisei angin De Rossi-a'n a kaihruai lo a, thla riat chiah an manager a ni hman tihin an ban. Juric-a lam an hawi a, mahse, Croatian coach phei chuan rei a daih lo lehzual - September thla tawpa an rawih kha November thlatirah chuan an ban fel der!

Roma neitu, Premier League club Everton lei tuma dawr mektu The Friedkin Group chuan thuchhuah siamin, "Ivan Juric hi he club a awm chhunga a hnathawh avangin lawmthu kan hrilh a ni. Hun harsa takah professional takin engkim a buaipui a, a chungah kan lawm em em a ni.

"Head coach tur kan zawng nghal a, ni rei lotêah kan puan fel hman kan beisei," a ti - Italy leh Manchester City manager hlui, tun hnaia Saudi Arabia nena inṭhen Roberto Mancini hming a ri ring hle.

Mancini hian Roma hi a enkawl a nih chuan hnathawh tur a tam dawn. Serie A table-ah 12-na an ni mek a, match 12-ah vawi thum chiah la chakin, vawi li draw an nei a, vawi nga an tlawm. Europa League lamah match li khel tawhin, vawi khat chiah an la chak a, vawi hnih draw tawhin, vawi khat an tlawm - table-ah 20-na an ni mek.