Barcelona-in ngam loh an tawng

Hansi Flick-a enkawlna hnuaia team hmuhnawm bik Barcelona chu La Liga-ah a vawi hnih nan an tlawm - Catalan club hian khualmualah Real Sociedad an lenchilh a, rin loh takin 1-0 in an tlawm.

Sociedad tan Sheraldo Becker chuan inkhela goal awmchhun a khung a, hun tawp thlengin goal dang a lut tawh lo. An mikhualna ramah Barcelona an mualpho a, an tlawm avangin pahnihna Real Madrid nena an inthlauhna chu point ruk chauh a ni ta.

Barcelona tan tun season-a an tlawm vawi hnihna a ni a, Real hian match khatin an khel tlem zawk tih theihnghilh lo la - Carlo Ancelotti naute hian an khelh tlemna match hi khel se, chak ta se point thum chauhin Barca an thlau tawh dawn tihna a ni.

Hetihlai hian Atletico Madrid chuan khualmualah hnehna an chang a, Real Mallorca chu 1-0 in an hneh - Julian Alvarez chuan inkhela goal awmchhun a khung a, point sarihin Barca an phak lo mek.

Barca an NIL

Flick-a hnuaiah Barca-in game hmuhnawm bik an pho chhuak ṭhin a, an attacking game na tak chu an hmingthanpui a ni. Mahse, Sociedad lakah hian Barca-in minute 90 chhungin target-ah 'shot' an nei thei lo a, Catalan club hi an mikhualna ramah an mualpho hneh hle.

Barca tan hian tlarhmaah Lamine Yamal chu hliam vangin a inlan thei lo a, kum 17 mi lek forward awm loh vangin Catalan club hi an talbuai tih loh rual a ni lo - an goal nawr a na lo a, tlarhnung an nghing reng bawk.

Inhliam hi football ken tel a nih miau avangin Flick-a tan a player ṭhate inhliam hlan a, an tel loa khelh dan zir thar a ṭul a, kum 17 mi forward awm loh vawi khat a lang lutuk kha Barca tan mualphona a ni.

Midfield-ah player hlawh hnem Frenkie de Jong a khel chhe takzet a, Dani Olmo-a'n a thlak hnuah an game danglam deuh mah se, si phurh sutna khawp a tling lo - Barca an mualpho.

Kha mah mah

Sociedad tan Sheraldo Becker-a'n minute 33-na lekah inkhela goal awmchhun a khung a, hetihlai hian hun a la tam tawk avangin Barca player an hlauthawng lo - mahse, hun tawp thlengin goal dang a lut lo a, Barca an tlawm.

Mualneitu team vanneih zan ni ngat se, Catalan club hi si phurh belh thei dinhmunah an ding zawk hial. Mikel Oyarzabal-a freekick pet chu Barça goalkeeper Iñaki Peña chuan ṭha zetin a dansak a, Oyarzabal hian hnai set sawtah a hlah bawk.

Barca tana player langsar ber chu Pena a ni a, hei hian inkhel dinhmun a hrilhfiah - Spanish keeper hian Oyarzabal, Take Kubo leh Brais Méndez khung ngei tur nia lang a dansak vek a, a che ṭha takzet.

Goal awmchhun khungtu Becker pawh a vanneih zan a ni lo mah mah! Kum 29 mi forward hian second half ṭantir lamah pawh chance duhawm vawi thum ngawt a nei a, a khung lo vek.

Lewy a vanduai

Barcelona tan striker chhuanvawr Robert Lewandowski-a'n minute 14-naah goal hmahruai a khung niah a inngai a, mahse, video assistant referee rawn niin, VAR chuan Polish striker hi a ke zungpui a offside tiin a pawmsak lo!

Spanish football-ah hian tun season aṭangin player offside leh offside loh en nan hian semi-automated offside technology (SAOT) hman ṭan a ni a, SAOT hmanga en niin, Lewy hi 'khawl' hian La Real defender Nayef Aguerd-a hmaah a ke zungpui lawr hmangin a offside niin a tarlang.

Barcelona coach Flick chuan, "Thutlukna dik lo a ni a, a lem pawh ka hmu vek a, thutlukna dik lo a ni, tih hi a lang chiang ngawih ngawih. Mahse, referee thiam loh erawh a ni lo - mihring vek kan ni a, thil tisual thei kan ni.

"Mahse, tun ṭum an tihsual erawh a lian khawp mai," a ti a, referee a dem lo chungin lungawi erawh a harsat tih a lang. SAOT hi Serie A chu a hmang hmasa ber an ni a, Premier League pawhin hman tumin an en chhin - mahse, tunah Lewy hi dik lo taka offside angin a hmu niin an sawi a, khawl meuh pawhin thutlukna siam sual chang a nei dawn niin a lang!