November chauh a la ni e - Pep

Manchester City manager Pep Guardiola chuan match li zet a zawnin a team tlawmpui tawh mah se, an thawh leh tur thu a sawi a, November thla chauh a la nih avangin chi ai tur an nih loh thu a sawi bawk.

Pep chuan, "Hei hian thil tam tak min hrilhfiah a, hnehna kan chan tluan laia ngaih ṭha taka awm a fuh lohzia min hrilh a ni. Tunah chuan hnehna chan harsatzia kan hria a, chak hlimawmzia pawh kan hre leh ang.

"Tunah hi chuan kan ṭhat dan berin kan awm lo tih hi a chiang em em a, mahse, November thla chauh a la ni - kan ṭhat dan berin kan khel chhuak leh ang," a ti a, a naute a ring tawk hle.

City hian an match hnuhnung paliah Tottenham Hotspur (2-1, League Cup), Bournemouth (2-1, EPL), Sporting Lisbon (4-1, UCL) leh Brighton & Hove Albion (2-1, EPL) an ngam lo a, Bournemouth laka an tlawm hma phei hi chuan league match 32 zet chu tlawm loin an kaltluang hman.

Pep chuan, "Football player ka lo ni ve tawh ṭhin a, match tam takah ka lo tlawm tawh - match li, nga, ruk thlengin a zawnin ka lo tlawm tawh. Thil danglam ka beisei ngai lo a, a hmaa kan chak zawn rei avang emaw kan special bik avanga tlawm thei lo angah ka inngai ngai lo," a ti a, midang ang thoa tlawm thei an nih ve thu a sawi.

City hian tun hnai an result avangin Premier League hmahruaitu an nihna pawh an hloh a, match 11 khelh tawhah point ngain a chung bera awm Liverpool an phak lo mek.

Hetihrual hian chhuanlam tur an nei bawk - Ruben Dias, John Stones, Kevin de Bruyne leh Jack Grealish te chu hliam vangin chhawr theih loh an ni mek a, Rodri leh Oscar Bobb an la chawl bawk.

Pep-a'n a sawi anga an insiamrem vat erawh a ngai dawn. International break zawhah Krismas hmain Tottenham Hotspur, Feyenoord (UCL), Liverpool, Nottingham Forest, Crystal Palace, Juventus (UCL), Manchester United leh Aston Villa an hmachhawn dawn - hmabak a hautak hle.