Davis leh James hoin Lakers an chak

Anthony Davis leh LeBron James te chuan Los Angeles Lakers tan nimin zing khan an thiamthil an lantir a, an khingpui Toronto Raptors lakah 123-103 in hnehna an chang.

Davis-a'n minute 26 chauh a khel a, mit (eye) hliam vangin a khel zui thei lo, a inlan chhung hian point 22 chu a nei hman tho. James pawhin point 19 bakah 16 assist leh 10 rebound a nei a, an chak nan a thawh hlawk leh hle.

Quarter khatna an khelh zawh chuan Raptors hian 34-26 in hma an hruai, quarter hnihna tir lamah pawh point 10 ngawta san fal laite an nei, mahse Lakers hian an inkar tizimin chawlhlawk laia an dinhmun chu 55-53 chauh a ni tawh a, an inhnaih tawh hle.

Minute thum leh second 59 la awmin Raptors hian 77-71 in hma an hruai thei, a tawpah erawh Lakers inlar hun a ni, hun tawp dawnah 16-5 ngawta kal falin an khingpui hi an pawtthla ta zawk a ni.

Inkhel dangah Golden State Warriors chuan Stephen Curry-a point 36 hmangin Oklahoma City 127-116 in an hneh. Milwaukee Bucks tan Giannis Antetokounmpo chuan point 43 tehmeuh nei mah se Boston Celtics lakah 113-107 in an tlawm thung.