Napoli leh Inter Milan inhnehtawk

Serie A champion lai Inter Milan leh tun season hmahruai mektu Napoli an inhmachhawn a, Italian champion nih tuma na taka inel lai pahnihte hi 1-1 in an inhnehtawk a, point khatah an lungawi a ngai.

Pathianni zan khan San Siro-ah Antonio Conte naute an lenglut a, minute 23-naah Manchester United midfielder hlui Scott McTominay-a'n goal hmahruai a khung a, chawlhlawk hma hretin Inter midfielder Hakan Calhanoglu chuan a sut.

Turkish midfielder ball pet thiam tak Calhanoglu hian yard 25-a hla aṭangin a khung a, keeper Alex Meret chuan a dansak thei lo. Mahse, Calhanoglu hian a hnuah penalty a hlah a, point thum hmuh theihna remchang an bawhpelh.

Tun hmain Calhanoglu hian penalty vawi 19 a pet tawh a, a khung fai vek - tum ṭumah erawh a vanneih ni a ni lo, a ball pet hian goal ban a per a, mikhual Naples lam vanneih ni a ni ve thung.

Inter Milan manager Simone Inzaghi chuan, "Team pahnihten point hmuh phu khawpin kan khel ve ve, chak zawk awm ngei ngei ngai ni se la chuan Inter kha chak zawk tur kan nih ngei a rinawm.

"Ka naute khan an hna an tlin em em mai a, chutihrualin tlarhma lamte ni dang aiin an hriam lo deuh - a chhan chu Napoli an inven thiam vang a ni," a ti a, an hmatawng Lautaro Martinez leh Marcus Thuram te an lo veng tluan thei a ni.

Napoli coach Antonio Conte erawh penalty an chawi danah a lawm lo, Video Assistant Referee (VAR) thutlukna chungchang sawiselin, "VAR hian thuneihna tak a nei lo emawni tih mai tur niin ka hria.

"Thil thlengte kha muangchang leh uluk taka ennawn a nih chuan penalty kha sut leh ngei turah ka ngai. VAR hi kan hmang a nih chuan referee thutlukna dik tawk lo tidik tur a ni a, tunah erawh chutiang chu a ni lem lo," a ti.

Italy rama football inelna sang berah Napoli hian match 12 aṭanga point 26 hmuin hma an hruai mek a, amahni hnaih bertu Inter Milan aiin point khatin an sang zawk - match khat lekah an dinhmun a la inthlak danglam thei reng tihna a ni.