Chelsea tana sum seng hnem Abramovich
Chelsea Football club neitu Roman Abramovich sum che vel buaipuitu Fordstam company chuan Russian sumdawng hausa hian a club enkawl nan kum 12 chhungin pound tluklehdingawn 1 chuang a sen tawh thu an sawi. Club hi account hran hmanga inrelbawl an nih avangin direct takin club neitu sum hi an hmang thei ngawt chuang lo a, Abramovich-a sum an hman pawh hi Chelsea-in 'loan' anga an puk a ni.
Chelsea-in Abramovich hnen aṭanga loan an lak zat zawng zawng hi nikum June thla thleng khan £1,041,243,000 a ni a, kum hmasa lama an hman tawh zat pound maktaduai 984 nena khaikhin chuan a punna hi a tam hle. Loan hi rul tura hriattirna pek a nih aṭanga thla 18 chhunga rulh zawh vek tur a ni dawn a, mahse Abramovich hi a sum hman hmuhlet leh lamah a hmanhmawh lem lo niin an sawi.
Nikum November thla khan Chelsea hian pound maktaduai 18.4 hlawkna season hmasa chhung khan an hmuhchhuah thu an lo puangzar tawh a, an player langsar tak tak Juan Mata, Kevin De Bruyne leh David Luiz te hralhna aṭang ringawtin pound maktaduai 65.1 an hmuchhuak a ni. Kumin bikah Andre Schurrle leh Ryan Bertrand an hralhna aṭangin pound maktaduai 34 an hmuchhuak a, Fiorentina aṭanga Juan Cuadrado lakluh nan pound maktaduai 27 an inseng thung.
Fordstam-in an tarlan dan chuan Chelsea player ho zawng zawng hlut zawng hi pound maktaduai 353 niin season hmasa a an player zawng zawng hlutna belhkhawm pound maktaduai 272.2 nena khaikhin chuan a tam hle. Chelsea hian an khelmual Stamford Bridge leh training ground-a facilities te tih changtlun nan ringawt pound maktaduai 13.7 nikum chhung khan an seng a, chanhai te ṭanpui nan pound maktaduai 2.9 an hmangral bawk.