Ka la champion thei - Sebastian Vettel
Ferrari driver Sebastian Vettel chuan kumin Formula 1 inelnaah champion theih ala inrin thu a sawi. Spanish Grand Prix-ah khan Mercedes driver pahnih Lewis Hamilton leh Nico Rosberg te tluk lo mah se Vettel hian beiseina ala nei sang hle.
Spain-ah khan Ferrari team hian hma an sawn hle a, tun season a an chet ṭhat ber ṭum ala ni hial ang. Vettel hian 45 second-in pakhatna Rosberg a tluk loh bakah Hamilton a umpha lo bawk. Mahse tun season intlansiak an hmachhawn tawh dangte nena khaikhin chuan Spain a Ferrari team chet dan kha a chhe lem lo hle.
Ferrari hian an car chu kawng hrang hranga an thuam ṭhat avangin Mercedes car pawh an el pha tawh tur a ngaih a ni a, hei hian Mercedes engineer te a ti ṭang lehzual sawtin a rinawm. Formula intlansiak hnuhnung ber Spain-ah pawh Mercedes leh Ferrari inthlauhna hi lap khatah 0.8 secs chauh a ni.
Vawili ngawt World champion lo ni tawh Vettel chuan, "Champion tur sawi nan chuan ala hma deuh a ni maithei, mahse champion tur inel zingah chuan kan tel ve dawn tih hi ka sawi chiang ngam. Kumina kan intlansiak tawhte kan thlir kir chuan Mercedes hi an che ṭha viau tih kan hre thei vek ang. Mahse, keini pawhin an tih ang hi kan ti ve thei. Kum bul kan ṭan dan nena khaikhin chuan kan intlansiak hnuhnung ber kha chu ṭha tawh tak a ni ringawt. Kan team-in hma kan sawn a, hun pawh kan hmang rei lo tial tial ang," tiin a sawi.
Tun dinhmunah Vettel hi World championship-ah point 80 hmuin pathumna a ni mek a, pakhatna Mercedes driver Hamilton a tluk lohna chu point 31 a ni mek.