Messi hi chu planet dang ami a ni - Tevez
Juventus striker Carlos Tevez chuan a hnampuipa Lionel Messi chu he khawvel ami pawh ni lo, planet dang aṭanga lokal a ang mai a nih thu a sawi.
Argentine striker Tevez hian a team te chu Champions League final a hruai thleng a, ani ang tho hian a hnampui Messi-a'n a club Barcelona chu Champions League final a hruai thleng ve bawk. Ram tan khel dun ṭhin mah se club-ah chuan inel an ni thung.
Kum 31 a upa Tevez chuan, "Messi hi chu khawvela player ṭha ber a ni chiang khawp mai, Champions League semi final-a a chet dante kha kan thlir chuan ani hi chu planet dang aṭanga lo kal mi bik ni mai hian ka hreṭhin. A theihna leh thiamna hi a chungchuang bik em em a, ani hi chuan football-ah hian thil mak danglam bik a ti thei," tiin an ram captain chu a dah sang hle.
Sawi chhunzawmin Tevez chuan, "Juventus-in final kan thleng hi kan phu ka ti, final thleng tura kan hnathawh leh thiltih zawng zawng kan thlir kir chuan Berlin thlen hi kan phu hlein ka hria," tiin Champions League final khelh chu an phu thu a sawi bawk.