Aizawl FC malsawmna thlentu Mala

India ramin tun maiah chuan FIFA World Cup a an thlen theih a rinawm loh a, chutiang bawk chuan Mizoram Premier League awm ṭan tirh thleng khan Mizoramin I League club a neih mai a beiseiawm loh bawk.

Ring lo tam tak zingah ring tlat an awm a, bei hram hram an awm a, a tawpa hming ṭha chu Mizoram a ni. Aizawl FC hlawhtlinna hi mi pakhat hnathawh a ni lo a, hming langsar tak erawh coach K. Malsawmkima a ni.

Kulikawn duh loh hnu Mala

2012 kum tawp lamah Vanglaini palaiin Mala a bia a, 'MPL lamah kir leh i tum em?' tia a zawhna chu Mala chuan, "Min sawmtu an awm chuan ka rawn kir leh ang chu, mahse sawmtu ka nei hrih lo," tiin a sawi.

Hetihlai hun hi FC Kulikawn aṭanga Mala an ban hlim a ni a, MPL1-ah FC Kulikawnin match nga an khelhah goal nga chauh an khung a, minute 300 chuang hret goal an khung tawh loh avangin an coach hi an ban.

Kulikawn an dawn chiang lo. Mala hian MPL1 inpuahchahna tournament lian L&L Memorial Tournament-ah FC Kulikawn hi a champion pui. Hei chauh hi a ni lo a, MPL ṭan hma season hian hmahruaitu an ni char char a, match hnuhnung bera chak loh vangin 2011 MFA League-ah pahnihna an ni a; 2010 MFA League-ah FC Kulikawn a champion pui bawk.

Kulikawn-in an club enkawlna tura an sawmna chhan hi RCFC, Leitan-a record a neih ṭhat vang a ni. Mala hian RCFC hi third division leh second division-ah a champion pui a, first division an kai hnuin I Day Football leh MFA Cup-ah an champion.

Luangmual lamtluang

2013-14 season-ah Mala hian MPL1 pasarihna Luangmual FC a zawm. 2013 I Day Football-ah Luangmual hi quarterfinal tla nghal mah se MPL2-ah Luangmual FC chu pahnihna a ni. MPL final hmasa berah Luangmual an chak a, second leg-ah an chak loh avangin nomawi an chawi ta lo.

Kulikawn boss hlui chuan, "Luangmual khan MPL2 Playoff an khelh avangin pressure a sang lo a, hlauhthawnna tur ka nei lo. Kan khel rei tial tial a, kan ṭha tulh tulh a, a tawpah chuan champion pha hialah kan inngai a, kan vanduai ta a ni," tiin Luangmuala a hun tawn a sawi.

Aizawl FC-ah a lut ta

MPL aṭanga Luangmual hrem a ni a, coach Mala tan awm zel a rem tawh lo - MPL season hnih chhunga player nei ṭha, result nei ṭha lo Aizawl FC a zawm.

Mala chuan, "MPL club enkawl zel ka châk si a, Aizawl FC sawmna kha hnar phal chiah ka ngai lo. Luangmual ka zawm tirh nen kha chuan a inang lo, Aizawl FC min lak chhan chu champion duh vang a ni a, pressure a sang hle a ni," tiin a sawi.

Aizawl FC hian kum 2012-a an indin thar leh Mala an lak inkarah hian nomawi pahnih chiah an chawi a - K. Laldailova Memorial, Aizawl North Zone leh Royal Gold Cup, Nagaland-ah an champion.

Mala hnuaiah IGAR (E) tournament, Silchar-ah an champion nghal a. I Day Football-ah Chanmari FC hneh mah se final-ah Dinthar FC an hneh lo. Amaherawhchu, MPL3 final-ah champion lai Chanmari FC hnehin an champion. Aizawl FC in din thar leh hnua inelna lian thama an champion vawi khatna a ni.

Aizawl FC champion puitu coach chuan, "MPL boruak hrim hrim hi a sang em em a, Chanmari FC kha MPL2 final-a kan hneh loh tawh avangin kan tlawm nawn leh ang tih kha ka hlau tak zet a. A tawpah chuan vawi hnih chak loh kha a rem ta bik lo a ni," tiin a champion avanga a thawk huai thu a sawi.

National Games-ah Gold

Mizoramin Santosh Trophy champion zarah National Games an khel thei a, Mizoram enkawl tura thlan chu Mala a ni.

MPL3 champion coach chuan, "Player duh duh lak theih tur emaw ka tia, ka phur khawp mai a. Amaherawhchu Chanmari FC lamin Santosh Trophy an khelh dawn avangin ka player duh ang kha ka la thei ta lo," tiin duhthusam squad a enkawl loh thu a sawi.

Mala chuan sawi zelin, "A sang ber thlir ngam loh chu practice zawm tawh lo turin ka ti a, mahse player inhnukdawk kan nei lo," a ti.

Aizawl FC player tam zawk awmna Mizoram team-in National Games an khel a, final-ah Punjab hnehin an champion.

Mizoramin National Games-ah gold medal an dawng. Mala hian Mizoram team hi ṭum dangah pawh a lo enkawl tawh a, result a nei ṭha hle. Northeast Games, Arunachal-ah Mizoram team gold medal a lak pui bakah Airtel Invitation, Guwahati-ah a champion pui a; ONGC Cup, Tripura-ah pahnihna a nih pui bawk.

National U19-ah Mizoram team ṭum hnih hruai tawhin ṭum khat zawkah pathumna a nih pui a, a sulhnu hi chhinchiah tlak tak a ni.

I League kalkawng

Aizawl FC-in ṭum thum I League Second Division an khelh tawhah vawi khat chiah final round an thleng a, table mawng­phahah an awm.

Tun ṭumah hian an tawnhriat an hmang ṭangkai a, coach thar Mala hnuaiah an tisual tawh lo. Match khat khelh hmabak an la nei tihin I League khel turin an tling.

Mala chuan, "Chanmari FC kan hneh loh hma zawng khan chuan hlauhthawnna ka nei lo a, kan hneh loh huah erawh ka rit vek. Second Phase kan ṭan chiaha United Sports kan hneh loh hnu phei kha chuan ka hlauthawng lehzual," tiin I League kalkawng harsatzia a sawi.

Aizawl FC boss chuan, "Lonestar kha kan tum vawi hnihnaah khan kan hneh ka ring lo a, kan chak loh hnuah erawh hmahruaitu kan la nih tho avangin I League kan khelh ngei erawh ka ring. Chanmari kan khelh meuh kha chuan hlauthawn tur ka nei tawh lo," a ti.

Aizawl FC-in Round 13-ah Chanmari FC an hneh a, anmahni hnaih bertu Lonestar Kashmir FC-in an khingpui an draw ve bawk avangin match khat khelh tur a la awm tihin I League khel turin an tling.

Lawmthu sawina

Aizawl FC coach Mala chuan, "Kan hlawhtlinna bul ber chu Pathian a ni. A dawttu chu kan president te chhungkua hi an ni. Pu Robert-a leh Pi Pari te hi an fakawm thlawt, pawisa nei chu an tam ang, mah se anni anga football tana inphal chu an tam lo. An indah sang lo a, an bulah kan duh ang kan sawi thei a, an mizia hrim hrim a fakawm ka ti," tiin a sawi.

Mala chuan sawi zelin, "Mizoram Football Association leh Zonet ṭangkawpin MPL an buatsaih hi tun dinhmun kan thlen theihna chhan dang leh chu a ni. MPL hi awm ta lo se, I League club hi kan la nei lo ang," tiin MPL chu a fak hle.

Aizawl FC chuan hmun hrang hrang aṭanga ṭawngṭaipuina an dawn chu an hlawhtlinna kawnga a pawimawh thu uar takin Vanglaini palai a hrilh bawk.