BRICS U17 Cup: India-ah La Masia?

Nakkum April thlaa India khawpui New Delhi-a khelh tur BRICS (Brazil, Russia, India, China, South Africa) Cup-ah Barcelona youth Academy lar La Masia U17 te chu lokal tura beisei an ni. La Masia nau­pangte hi an lo kal a nih chuan special invitee angin an khel dawn a ni.

BRICS Cup hi BRICS sumit neihruala thawhhona ṭha zawk ram panga te'n an neih theihna tura khelh a ni dawn a, nakuma an khelh tur hi a vawikhatna tur a ni dawn a ni.

Associated Chambers of Commerce and Industry of India (ASSOCHAM) leh BRICS te'n Thawhlehnia thawh­hona thuthlung an ziah dan chuan ram panga aiawh te hi group hnihah ṭhen an ni anga, La Masia naupang te hi group pakhat zawk zawkah awmin group pakhatah team pahnih zel an awm thei dawn a ni. Group pahniha point hmu sang pahnihin semi-final an khel bawk ang.

BRICS Cup organiser te chuan Barcelona nena thawk dun mek UNICEF chu La Masia U17 team India a an rawn kal theihna tura an biak mek thu sawiin, "BRICS hnuaiah hian ram panga chiah an awm avangin team pakhat chu a sawma sawm an ni dawn a, tunah hian UNICEF leh Barcelona an indawr mek a ni," tiin Times of India an hrilh.

BRICS Cup hi kum 2017-a FIFA U17 World Cup thleng tur India U17 team tan inbuatsaihna ṭha tak a ni dawn. All India Football Federation (AIFF) general secretary Kushal Das chuan, "Brazil leh Russia team te nena inkhelh hi kan nau te tan hmasawnna nasa tak a ni dawn a ni. Nicolai Adam (India U17 coach)pawh organiser te nen ka inhmelhriat tir tawh a, he tournamnet atan hian a phur tawh hle a ni," a ti.

ASSOCHAM in he tournament buatsaih a nih theih nana a thawhpui zinga mi Joao Gilberto Vaz chuan, "India hi tun hnaiah Insia Super Lea­gue avangin football sumdawnna kawnga hmun pawimawh ber a ni tawh a ni. BRICS tournament khelh a nih theih nan India hian a thawhhlawk hle a, he tournament hi India football hmelhmang thlak danglam theitu tur a ni dawn a ni,"a ti.

Joao Gilberto Vaz chuan, "BRICS U17 Football Cup hi kumtin khelh turin kan ruahman dawn a, a theih phei chuan BRICS Summit nena inrual turin FIFA U17 tournament kalphung zulzuiin kan buatsaih ṭhin dawn a ni," a ti.