AFC Cup Tlang chiang tawh Bengaluru an chak lo
Thawhlehni zan khan AFC Cup group stage-a an match hnuhnung ber India club pahnih Bengaluru FC leh East Bengal te'n an khel a, Bangalore club-in an khingpui Indonesian club Persipura Jayapura 1-3 a an hneh loh laiin East Bengal-in an khingpui Hongkong club Kitchee SC chu 2-2 in an inhnehtawk pui thung.
Shree Kantirava Stadium-a inkhelah mual neitu tan Mizo tlangval Lalthuammawia Ralte leh Beikhokhei te an inlan. Inkhel ṭan aṭanga minute 23 na lekah Bengaluru-in Sunil Chhetri aia lut Udanta Singh goal thun hmangin hma hruai mah se mikhual team in goal thum laia an chhanlet avangin 1-3 in Bengaluru a tlawm zawkah an ṭang ta a ni.
Bengaluru hi Group E-ah awmin vawi ruk inkhelhah vawi li chakin vawi hnih an chak lo a, point 12 hmu in an awmna group-ah pahnihna an ni a, last 16 an lut. An hneh loh tak Persipura hi group hmahruaitu an ni thung a ni.
Vawikhat chiah chak thei East Bengal
Kolkata club lian East bengal in vawi nga inkhela vawi khat chiah chak hmel hmu chungin AFC Cup-a'n mangṭha a ṭul ta. Thawhlehni zana Mong Kok Stadium, Hong Kong-a inkhelah mual neitu team in 2-0 in hma an hruai reng a, Ranti Martins leh Cavin Lobo te'n Kolkata tan chhangletin 2-2 in inkhel an ṭin a ni.