Andy Murray-a'n hma a sawn zel

Britain Andy Murray chuan France Jeremy Chardy chu 6-4, 6-3 a hnehin Italian Open last 16 a in hlangkai. Murray hi a zawnin Clay-ah vawi 10 a chak ta. Belgian David Goffin-a nen an inhmachhawn leh ang.

Tun hnai tournament vawi 17 a khelh aṭangin vawi 16 zet chu last 16 a inhlangkai ta a, thla tawp a khelh ṭan tur French Open tan a inbuatsaih ṭha chho viau a ni.

Kum 27 a upa Murray chuan, "Kan inkhelh ṭan tirh khan ka ke a nat deuh avangin harsatna ka nei a, mahse a rei hnu khan harsatna min thlen ta lem lo. Chardy-a khan sevice a nei ṭha em em a, khami lo dan kha a harsa ṭhin hle. Zawi zawia insiam ṭha chho bek bekin hnehna ka changthei hi ka lawm hle a ni," tiin a sawi.

British miten an ngaihsan rawn Murray a chak lai hian a hnam pui Heather Watson-i chuan second round-ah Carla Suarez Navarro chu 6-1, 6-1 in a lo hneh lo thung.

Mipa inkhel dangah seeded palina Rafael Nadal chuan Marsel Ilhan chu 6-2, 6-0 in awlsam takin a hneh. Nadal hian kar hmasa mai khan Madrid Open final-ah Murray a hneh lo. Tun tournamnet-ah hian Murray leh Nadal hi an chhak chho zel a nih chuan an inhmachhawn leh dawn, phuba lak theihna hun ṭha Nadal hian a nei ang.

Roger Federer chuan last 16 lut turin Pablo Cuevas chu 7-6 (7-3), 6-4 in a lo hneh ve bawk a, tun thla chhungin Federer hian Cuevas hi vawihnih a hneh na a ni.