Gerrard hi coach ṭha tak a ni thei ang - Gerard Houllier

Liverpool manager hlui Gerard Houllier chuan Liverpool captain season thara USA pan mai tur Steven Gerrard chu manager hlawhtling tak a la nih theih a rin thu a sawi.

Kum 2000-01 seasona FA Cup, League Cup leh UEFA Cup Liverpool chawipuitu Houllier chuan, "Stevie hian inkhelh a chawlhsan hunah manager ropui tak a nih theih ka ring tlat a ni. Thil dang zawng zawng aia team dah hmasa ber ṭhin a nihna hi manager ang pawha hlawhtlinpui tham a ni," tiin Liverpool captain chungchang a sawi.

Kum 1998-a a senior game hmasa ber Gerrard khelh tir tu Houllier chuan, "Team ngaihtuah tura ngaihtuahna sen ngai ang zawng zawng hi chu a nei kim vek a, club leh midang hmasawnna tur a ngaihtuah em em bawk. Stevie te ang hi chu midang kaihruai tura piang ve hrim hrim an ni a, amahah hian entawn tur a tam em em a, mi tam takin a hnung zui hi an chak a ni," tiin 'Captain fantastic' tia n koh Gerrard-a leadership chu ropui a tih thu a sawi.

French national team pawh lo enkawl tawh Houllier chuan, "Fan-te'n Stevie hi an ngai khawp ang, hruaitu ropui tak a nih anga a team kaihruai ṭhintu a nih vangin fan-te tan chuan a ngaihawm dawn a ni," a ti.

England captain hlui David Beckham-a'n kum 2007-a LA Galaxy a zawm hnua England captain hlui LA Galaxy zawm leh hmasa ber tur Gerrard hian tun season-ah Liverpool tan game hnih chiah khelh a hmabak tawh a ni.

Kum 2003-a Reds captain ni tura Gerrard ruat tu Houllier chuan, " Galaxy fan-te'n Beckham an ngainat tluk zetin Gerrard pawh hi an ngaina dawn. World class player mahni team te chakpui thei khawpa thiamna nei a ni. Gerrard te ang player ropui an nei tur hi MLS pawh an vannei a, Stevie pawh ava hlawhtling ngei ang tihah hian ka chiang a ni. Engtikah emaw chuan Liverpool hian a lo kir leh dawn a, tunhnaiah a lo kir leh nghal mai lo a nih pawhin engtikah emaw chuan a lo kir leh em em ang," tiin Gerrard chuan Liverpool a kalsan tak tak theihloh tur thu a sawi.