Amorim-a'n Manchester United a thleng ta

Pathianni zan khan Manchester United coach thar Ruben Amorim chuan a club enkawl lai Sporting Lisbon chu an match hnuhnung ber a khelhpui a, Portuguese club a kaihhruai hnuhnung berah hian 4-2 in Braga lakah hnehna an chang.

Champions League-a 4-1 ngawta Manchester City a sawp pui club hi dinhmun duhawm takah dahin a kalsan - league match 11 an khelhah an chak vek a, Portuguese top flight league-ah point rukin an sang fal.

Amorim a chawl hahdam hman lo. Braga an hneh hnu lawkah Manchester khawpui panin a thlawk chhuak lehnghal a, Thawhṭanni tlai lam khan Manchester club training-na hmunpui Carrington training complex a tlawh nghal.

Kum 39 mi coach hi club chief executive Omar Berrada, sporting director Dan Ashworth leh technical director Jason Wilcox te an lo lawm a, work visa a neih ve leha hnathawk ṭan nghal thei turin United staff pawimawhte nan an titi hona an nei zui.

Inbuatsaihna hun

International break hman mek a nih avangin Amorim-a'n ni 13 chhung a player-te enkawl turin hun a nei dawn a, November 14 zanah match hmasa ber kaihruaiin Ipswich Town chu khualmualah an lenchilh ang.

A engemaw zawng taka thlir chuan Amorim hi a vannei a tih theih a, a match hmasa berah club langsar a hmachhawn nghal dawn loh avangin a tan a awlsam hret dawn tih a chiang - December 4 zana Arsenal an lenchilh hmain match thum a team a kaihruai hman dawn.

Emirates Stadium an len hma hian Ipswich (league), Bodo/Glimt (Europa League) leh Everton (league) chu an hmachhawn tur an ni dawn a, Amorim hian club langsar lutuk lo pathum a hmachhawn chhungin an ṭhat dan tur a hre hman tura ngaih a ni.

Hei mai a ni lo - assistant coach aṭanga bang ta, club legend Ruud van Nistelrooy-a'n Erik ten Hag ban hnuah United 'mood' a thlak hman a, match li a kaihhruaiah an tlawm miah lo. Vawi thum an chak a, vawi khat an draw.

Ka inpeih e

Amorim hi Liverpool nen pawh sawi zawm a ni a, mahse, Reds thuneitute hian a khelh dan system an zirchian hnuah Arne Slot lam an hawi - West Ham nen pawh London khawpuiah an indawr hman a, an inrem ta lo. Tunah United a enkawl dawn ta.

Portuguese coach chuan, "Ka hmaa chona inchhawp hmachhawn turin ka inpeih tawh e. A nih loh ang puia thil thlir ka tum lo - he laia team enkawl nen a inang dawn lo tih ka hria a, a harsa dawn tih pawh ka hria.

"Mahse, tunah chuan thlamuang takin ka awm thei ta e. Ka hna tharah ka rilru zawng zawng ka pe thei dawn a, hna thawh ka châk tawh hle a ni. He lai hmuna ka hnathawh ang hi chhunzawm a harsa ang tih ka hria a, pressure leh thil dang awm thei pawh ka hrethiam," a ti.

Player a nih laia Portugal tana vawi 14 inlan hman Amorim hian Sporting Lisbon hi Primeira Liga-ah vawi hnih a champion pui hman a, season hmasa lawk pawh khan nomawi a chawipui - an league-ah hian FC Porto leh Benfica te an awm ve tih theihnghilh suh.

Ka hre tawh

Old Trafford-a kum hnih leh a chanve atana contract ziaktu Amorim hian khelh dan phung nghet a nei a, Portugal-ah chuan 3-4-3 formation hmangin a larpui hle - United-ah pawh a hman chhunzawm a rinawm a, a team a khelhtir dan turah a chiansa thu a sawi.

Club pahnih, Braga leh Sporting chiah la enkawl Amorim chuan, "Engtiangin nge United-ah hian bul ka ṭan ang a, ka team ka khelhtir ang tihah hian ka chiang sa vek. A tirah chuan kan thiamsa system hmanga bul ṭan a fuh a, player kan neihte milin kan inher rem zui ang," a ti - Braga (76.92%) leh Sporting (71%) a a win percentage theihnghilh lo la!

Portuguese coach chuan sawi zawmin, "Player inhliam eng zat chiah nge kan neih a, player eng ang mi nge kan kawl, tih te, kan tlarhnung leh tlarhma thlengin kar loah ka hriatchian vek ka beisei," a ti a, a inpeih tawh hle.

Amorim tan hna erawh a awlsam dawn lo - Premier League match 11-ah vawi li chiah la chakin, table-ah 13-na an ni mek a, Europa League match li an khelh tawhah vawi khat chiah la chakin, team 36 zingah 15-na an ni mek bawk.