Liverpool hawtu David Coote?

David Coote-a'n mawi lo takin Liverpool chungchang a sawi a, hetiang thil a darh takah chuan fans tam takin Coote-a'n Liverpool inkhel a enkawl tawh ho an thlirlet a, English referee-in thutlukna dik lo taka siam a nei nual tih a lang.

2019-2020

Reds-in league nomawi an chawi season-ah Coote-a chesual nual tlat! Old Trafford-a Liverpool an lenluh ṭumin English referee hi video assistant referee a ni a, Marcus Rashford-a'n United tan goal hmahruai a khung.

English forward goal khung hma hian Victor Lindelof chu Divock Origi lakah a foul ngei niin a lang a, mahse, VAR a inrawlh lo! Inkhelh zawhah Klopp chuan, "VAR ṭhat tawk lohzia pholangtu game a ni," a ti.

2020-2021

Kum 2020 October khan Merseyside derby-ah Liverpool leh Everton an inkhel a, Coote hi video assistant referee (VAR) a ni leh. Everton keeper Jordan Pickford chu Liverpool defender Virgil van Dijk lakah hlauhawm takin a che a, VVD hi minute rukna lekah lakchhuah a ngai. VVD hi a offside avangin penalty pek theih a ni lo a, chutihrual chuan Pickford-a chet dan hi hnawhchhuah ngei tur niin a lang thung.

Mahse, VAR hian inkhel referee Michael Oliver chu VAR rawn turin thurawn a pe lo! A hnuah Oliver hian VVD offside ringawt an lo ngaihtuah luatah VAR an check theihnghilh thu a sawi - an puipa ber VVD season tluana a inhliam avangin Liverpool-in league-ah pathumna dinhmun an hauh hram.

2023-2024

Nikum December khan Liverpool-in Arsenal an mikhual a, 1-1 in an inhnehtawk - hetihlai hian Reds hian match 17 khel tawhin, vawi khat chiah an la tlawm a, champion an la beisei vanglai tak a ni.

Mahse, he inkhelah hian Arsenal midfielder Martin Odegaard chuan a kutin penalty box-ah ball khawih mah se, referee Chris Kavanagh leh VAR Coote-ten penalty pekna turah an ngai lo a, an kaltlangtir. PGMOL hotupa Howard Webb chuan a hnuah penalty tur a nih thu a sawi a, an naute pahnihin an tihsual thu a sawi leh si - Reds tan a na vawng vawng.