Inter Village Football-ah goal a lut hnem nghal

Mizoram Football Association buatsaiha neih GIG Motors All Mizoram Inter Village Football Championship 2024 chu nimin khan khelh ṭan a ni a, tualchhung football-a hming langsar Dinthar chuan round of 64 lut turin Tuirial chu 3-2 in an hneh.

1st BN MAP Ground, Armed Venga inkhelah Dinthar hian si an phur hmasa zawk - Tuirial tan Timothy Lalfakmawia chuan goal hnih khungin, Dinthar lakah hnehna chan ngei an tum.

Mahse, tawnhriat nei ṭha Dinthar an hnual duh lo a, first half chhungin C.Lalnunthara leh Zohmingsanga goal hmanga si phurh sutin, Vanlalhriata chuan minute 77-naah penalty hmangin chakna goal a khung zui.

Armed Venga inkhelah goal a lut hnem hlawm hle - match hmasa berah Chite Veng chuan sang taka invawrh an tum tih pholangin, goal sarih ngawt an khung a, Central Jail Veng lakah 7-0 in an chak.

Chite tan Jerome Lalawmpuia'n goal hnih a khung a, Vanlalhlimpuia, Ramthianghlima, Lalchhanhima leh R. Rodinthara ten goal khat ṭheuh an khung bawk - Chitein goal khung pui mamawh lo mah se, Central Jail Veng player Lalruatfela chuan an lamah a tilut.

Falkawn pawhin Maubawk laka hnehna chang turin harsatna an tawk lo a, 5-2 in an chak - Falkawn tan Lalnunsanga'n goal hnih khungin Rosangzuala, Ramdintluanga leh Isac Lalropuia ten goal khat ve ve an thawh bawk.

Chite khelmual lamah Tuidamin Hnahlan an pet chhuak - Hnahlan hian Malsawmdawngliana hmangin goal khung hmasa zawk mah se, Tuidam hian Samson Ramnunmawia hmangin si phurh an sut a, penalty pet zui niin, Tuidam hian 5-3 in hnehna an chang.

New Serchhip pawhin Inter Village Football-a Chamring an cham ve reng an rem ti lo a, 5-3 in puanthuah an tel tir. Chamring hian minute kuana leka Vanneihtluanga goal hmangin hmahruai mah se, New Serchhip lamin na takin an chhanglet a, an zinkawng a tawp.

Dawrpui Vengtharin Rangvamual laka zahngaihna lantir ṭul an ti lo. Vanlalchhuanga'n goal li ngawt Chite khelmualah khungin Dawrpui Vengthar hi dinhmun duhawmah a dah a, Lalremtluanga leh Gospel Lalruatsanga ten goal khat ve ve an khung bawk - RV tana Lalruatsanga goal khung chu mualpho zualpui khuhna chauh a ni.

Vawiin hian Chite leh 1st BN MAP khelmualah te match thum ve ve a awm leh dawn a, Chite Veng khelmuala chhun dar 12:00-a Ramthar Veng leh Armed Veng intawng tur hi mipui hmuh châk inkhel a ni dawn.