Alcaraz hnehtu Ruud

Casper Ruud chuan ATP Finals 2024 bul a ṭan fuh hle, group match hmasa berah Carlos Alcaraz chu straight set hmangin a hneh. Inkhel dangah Alexander Zverev pawhin harsatna nei loin Andrey Rublev a hneh ve bawk.

Thawhṭanni zan khan Turin, Italy-ah John Newcombe Group te inlanin Ruud hian 6-1, 7-5 in hnehna a chang a, tun season kal laiah vawi 50 a chak tling ta chiah - Alcaraz nen bik vawi nga an intawn tawhah ṭum khat a chak vena a ni chiah thung.

French Open leh Wimbledon champion lai Alcaraz a che fuh hleithei lo, ama tihsual vanga a khingpuiin point a hmuh hi vawi 34 ngawt a tling a, tun hma lama a ngam ṭhin tak lakah a tho chhuak thei lo.

Norway tlangval Ruud chuan, "Inelna bul kan ṭan a, tunah chuan match khat chauh kan la khelh avangin kan dinhmun tur sawi lawk theih a la ni lo, chutihrualin ka bul ṭan danah erawh ka lawm hle.

"Carlos hi player ṭha leh thawkrim a ni a, tun ṭumah pawh khan a khel ṭha leh hle. Tun hnaiah inrintawkna ka nei sang lo deuh tih ka hria, mahse tun ṭum match bikah chuan engmah hlauh nei loa ka khel thei kha ka ṭhatpui," tiin a sawi.

Seeded parukna Ruud hian a match pahnihna atan Ningani zanah Alexander Zverev a tum leh dawn a, seeded pahnihna Alcaraz-a'n zanin dar 6:30 hian Rublev a hmachhawn leh nghal thung ang.

Kum 21 mi Alcaraz chuan, "Tournament khelh hma khan nasa vak loin ka damlo. Turin ka pan hnuah erawh ṭha takin ka training thei a, chhuanlam siam erawh ka tum lo, tun ṭumah kha chuan Casper khan chak phu zawkin a khel," a ti.

Inkhel dangah Alexander Zverev pawh a chak nuamsa viau. ATP Finals vawi hnih champion tawh Zverev hian a khingpui Andrey Rublev chu 6-4, 6-4 in a hneh a, Russian tlangval lakah harsatna lian a tawk lo.

Seeded pahnihna Zverev chuan, "ATP Finals-ah chuan khingpui awlsam a awm thei tawh lo, player zawng zawng hi hmachhawn an harsa vek a, chetsual theihna vek an ni. Ka tan chuan bul ṭanna duhthusam tiin a sawi theih," tiin a sawi.