Netherlands tan De Jong koh a ni leh ta

Netherlands coach Ronald Koeman chuan hun rei tak hnuah Frenkie de Jong a ko leh ta a, hetihlai hian Memphis Depay erawh inkhel turin a taksa a inpeih tawk lo - Dutch team hian Nations League-ah Hungary an mikhual dawn a ni.

De Jong-a'n an ram tana match a khelh hnuhnung ber chu Ireland nen European qualifier an khelh kha niin, an ram jersey a hak aṭangin thla 14 a liam tawh - hliam vangin kum khat chuang a inkhel lo tihna a ni.

A kerek hliam vangin season hmasa kha a inkhel thei lo a, a club Barcelona leh Netherlands tan chânna lian tak a tling. Kar tawpa Barcelona leh Real Sociedad inkhelah khan inlanin hliam tenau a tuar a, mahse chawlh a ngai dawn lo niin a lang.

Netherlands team manager Koeman chuan, "A hliam neih kha a kerek ni loin a ngal a ni a, chuvangin training a zawm pangngai ve leh nghal thei turah kan ngai. Frenkie de Jong hi kan tan chuan player pawimawh a ni a, a awm theih hi kan duhthusam a ni.

"Chutihrualin, amah a inpeih tawk lo a nih chuan tumah kan in nawr lui ngai lo, player dangin a hmun ruak an luah mai ang," a ti. Depay erawh Euro hnuah ram tana koh a la ni leh lo, a club Corinthians tan inlan tawh mah se Koeman duh angin a che rih lo niin a lang.

Netherlands hian Inrinni zanah Hungary an lo mikhual ang a, chumi hnuah Bosnia an lenchilh zui leh bawk ang. Koeman-a naute hian League A Group 3-ah match li an khelh aṭangin point nga an hmu a, ram pali inel zingah pahnihna an ni mek, an chungah point 10 neitu Germany an awm.

Netherlands Squad:

Goalkeepers: Mark Flekken (Brentford), Nick Olij (Sparta Rotterdam), Bart Verbruggen (Brighton & Hove Albion).

Defenders: Matthijs de Ligt (Manchester United), Stefan de Vrij, Denzel Dumfries (both Inter Milan), Jorrel Hato, Devyne Rensch (both Ajax Amsterdam), Jurrien Timber (Arsenal), Virgil van Dijk (Liverpool), Jan Paul van Hecke (Brighton & Hove Albion).

Midfielders: Frenkie de Jong (Barcelona), Jeremie Frimpong (Bayer Leverkusen), Ryan Gravenberch (Liverpool), Teun Koopmeiners (Juventus), Tijjani Reijnders (AC Milan), Quinten Timber (Feyenoord), Mats Wieffer (Brighton & Hove Albion).

Forwards: Brian Brobbey (Ajax Amsterdam), Cody Gakpo (Liverpool), Justin Kluivert (Bournemouth), Noa Lang (PSV Eindhoven), Donyell Malen (Borussia Dortmund), Wout Weghorst (Ajax Amsterdam), Joshua Zirkzee (Manchester United).