Mizoram Sports Minister-in taekwondo zir tur thlah liam

Sports minister Lalnghinglova Hmar chuan China rama taekwondo leh Bachelor of Arts (BA) zir tur a thlah liam. Beijing-ah Vanlalhmangaihzuali d/o Lalrinawma, Kolasib New Diakkawn leh Joseph Vanlalpeka s/o Lalremruata (L), Armed Veng South te an kal dawn a ni.

Tetea Hmar chuan a pisa-ah thlahna hun hmangin, “Mizoram sports in hma a sawn zel theihna’n sports association hruaitute leh infiammite’n National level leh International level thleng phaka ngaihtuahna kan sen a ṭul.

"Mizoram Amateur Taekwon-do Association (MATA) hruaitute hmathlir leh hmalakna hrang hrangte a lawmawm a, Taekwondo hi international level-a medal hnaih theihna sports discipline zingah a tel a ni," a ti.

Vanlalhmangaihzuali leh Joseph Vanlalpeka te chu an University leh China-ah Mizo aiawhtu leh Mizoram hmel lanna an ni dawn tih a sawi a. An zirna leh ni tin nunphungah Mizo an nih hre reng a, Mizo nun zemawi vawng zel turin a chah. Ṭawng, hriselna leh zirna chungchangah harsatna an tawh chang pawhin an kal chhan hre reng a, hlawhtling ngei tura thawkrim turin a fuih nghal bawk. Sports Minister hian Vanlalhmangaihzuali leh Joseph-a te hi pawisa fai a pai a ni.

Vawiina thlahna hunah hian Mizoram Amateur Taekwondo Association hruaitute’n report pein fuihna thu an sawi a, Beijing, China-a kal turte chu Mizoram tana kal an nih hre reng a, theihtawp chhuah turin an chah a ni. Hmathlir thui tak nen Mizoram Sports Conclave buatsaih a, Mizo infiammite tana kawng hawnsaktu Sports Minister chungah lawmthu an sawi bawk.

Vanlalhmangaihzuali leh Joseph Vanlalpeka te zirna tur hi Capital University of Physical Education & Sports, Beijing, China a ni a, an luhna hi foreign sponsorship quota a ni. Kumin June 13-14 chhunga Aizawl-a Mizoram Sports Conclave buatsaih a nih tum a lo kal, Grand Master Kim Hee do leh Grand Master Lee Jeong Hee te’n Mizoram Olympic 2036 Vision a hlawhtlinna turin he sponsorship hi an buaipui a ni.

Sports University-ah sponsorship hmuh thu an hriat veleh MATA chuan thuchhuah an siam nghal, diltu engmaw zat aṭangin Grand Master ten tehfung chi hrang hrang hmangin an lo endik. Endikna hrang hrang paltlang hnuah India aṭangin Vanlalhmangaihi leh Joseph Vanlalpeka te chu zir thei tura thlan an ni.

University-ah hian China zirlaite kalphung ang thoin kum khat chhung chu China ṭawng (Mandarin) an zir ang a, chumi chhung chuan Taekwondo zirtirna an kalpui dawn a ni. Kum khat hnuah hian Bachelor of Arts an zir chhunzawm ang.