United-ah Van Nistelrooy tan hmun a awm lo

Manchester United manager lailawk Ruud van Nistelrooy chuan Old Trafford a chhuahsan ta - United legend hian a club hluiah cham zel duh mah se, coach thar Ruben Amorim-a kaihhruaina hnuaiah a tan hmun a awm lo a, United a chhuahsan ta zawk.

Nistelrooy hian July thla khan United hi assistant coach ni turin a zawm a, kum hnih chhung atan contract a ziak. Mahse, Red Devils-in Erik ten Hag an ban a, coach lailawka Nistelrooy ruat chungin Amorim chu coach turin an la lut.

Hetiang a nih avang hian Nistelrooy hma hun a chiang lo zui a, tunah a chiang ta - Red Devils hi match li a kaihhruaiah tlawmpui miah lo mah se, coach thar Amorim-a'n assistant coach atana a mamawh zingah a telh lo a, a chhuak.

United chuan thuchhuah siamin, "Ruud hi engtiklai pawhin United legend a ni reng ang. He club tana a hnathawh avangin a chungah kan lawm a, kan hnena a awm chhunga a hmachhawp a hlen danah kan lawm hle - Old Trafford-ah hian a tan hmun a awm reng dawn a ni," a ti.

Nistelrooy chiah ni loin United hian an coaching staff zinga mi Rene Hake, Jelle ten Rouwelaar leh Pieter Morel te pawh an chhuahtir a, hetihlai hian first team leh academy lama hna thawk, club player hlui tho Darren Fletcher erawh chhuahtir a ni ve lo a, a cham chhunzawm zel dawn.

United chuan, "Amorim hnuaia coaching staff chu a rang lamin kan puang ang," tiin an sawi a, he thuziak i chhiar meuh chuan an puang fel tawh hial mai thei - coach-ten an club enkawla an thachhang dawltute an chhawm fo avangin United-in Nistelrooy leh coaching staff dang an chhuahtir hi thilmak a ni hran lo.

Kum 48 mi ni ve tawh Ruud van Nistelrooy hian 2001-2006 inkar kha Manchester United tan khelin, inelna hrang hrangah match 219 khelin goal 150 a khungsak a, Premier League, FA Cup, League Cup leh Community Shield-ah te vawi khat ṭheuh nomawi a chawipui.

Kum 2001-02 season khan PFA Players' Player of the Year-ah thlan a, PFA Fans' Player of the Year a ni tel bawk. Kum 2002-03 season-ah khan top scorer niin, league match 34-ah goal 25 ngawt hemi season-ah hian a khung.

Inkhelh a chawlhsan hnuah PSV reserve team leh PSV Eindhoven a enkawl tawh a, player a nih laia league nomawi vawi hnih ngawt a lo chawipui tawh club hi KNVB Cup (2022-23) leh Johan Cruyff Shield (2022) ah te nomawi a chawipui - club enkawl tur a van lo ang.