Filipe Luis a champion nghal

Chelsea full back hlui Filipe Luis chuan thla khat chuang awrh coach hna a chelh hman tihin nomawi a chawi der - Flamengo chu Copa do Brasil-ah a champion pui a, he inelna hi hriatthiam awlsam dan turah chuan English football-a FA Cup ang hi a ni.

Flamengo hian final second leg-ah Atletico Mineiro chu 1-0 in an hneh a, inkhel hmasa nena belhkhawmin 4-1 in hnehna an chang - Filipe Luis-a'n champion nomawi a chawi der a, coaching lamah hmabak a nei êng hle.

Kum 39 mi Luis hian September 30 khan Brazilian club lar Flamengo hi a enkawl ṭan a, Brazil coach hlui Tite chu ban a nih avangin a hmun ruak a luah. A tirah coach lailawk atan ruat a ni zet a, ni khat hnuah coach nghet atan ruat zui a ni.

Player a nih laia Brazil tana vawi 44 inlan hman player hian a vanglaiin an ram club Figueirense, Dutch club Ajax, Real Madrid B team, Deportivo La Coruna, Atletico Madrid, Chelsea leh Flamengo tan a khel hman.

Kum 2019 khan Flamengo hi zawmin, Brazilian Serie A leh Copa Libertadores nomawi pahnih ve ve a chawipui a, December 2023 khan inkhelh a chawlhsan. January thla khan club Under-17 team chu a enkawl ṭan a, a hnuah U20-ah chhoin, August thla khan Under-20 Intercontinental Cup-ah a champion pui.

September-ah senior team enkawl turin ruat zui a ni a, player a nih lai pawha nomawi chawi thei tak hian nomawi a chawi leh ta. Luis chuan nomawi an chawi hnu hian, "Flamengo hi South America-a team ṭha ber kan ni a, Europe-a club ṭhate el phak kan ni," a ti a, a ṭawng pawr nghal hle.

Flamengo hi Serie A table-ah pangana ni mekin, hmahruaitu Botafogo chu point 10-in an phak lo mek - match khatin an khel tlem zawk a, hetihrual hian match ruk chiah khelh tur a awm tawh avangin an tan league nomawi chawi turin thilmak a thlen tel a ngai tawh.