Match 12 chak zawn Cleveland Cavaliers

NBA regular season khelh laiah Cleveland Cavaliers chu an la chak vek - Cavs hian nimin zing khan Chicago Bulls chu 119-113 in an hneh a, tun season match 12 an khelh tawhah hnehna an la chang vek a ni.

Basketball inelna lianah hian tun hmain team pasarih chuan season tir lam an match hmasa 12-ah hnehna an lo chang tawh a, tunah chuan Cleveland hian an tawng thei ve ta chiah, team pariatnna an ni.

Kum 2015-15 season khan Golden State Warriors chu a zawnin match 24 chhung an lo chak tawh, anni hnuah chuan Cleveland hi season bul ṭan fuh leh ber an ni a, an recod awm lai hi tih ṭhat zual zel an tum ngei ang.

Cleveland Cavaliers tan hian Donovan Mitchell chuan point 36 neiin a thawh hlawk ber a, ani bakah hian player dang panga chuan point 10 an nei tling vek, awlsam taka chak erawh an ni bik lo.

Team pahnih an inkhel tawk hle, quarter thumna an khelh lai phei chuan Bulls lamin point kua ngawtin hma an hruai fal. Mahse, match dang ang bawkin a tawp thlengin Cleveland Cavaliers an ṭang tlat a, hnehna changtu an ni leh ta zawk.

Cavs thiampuipa Donovan Mitchell chuan, "Match tin mai hi a boruak leh thil kal dan a danglam zel a, kan team inpumkhatna erawh a danglam ve ngai lo thung a, kan chak theih chhan pawh a ni.

"Team dangah chuan mimal hming a langsar pawh a ni mai thei, keiniah erawh chuan a ni ve lo. Point score hi en ila a chiang hle, kan zavaia thawhrim rah kan seng mek a, chhunzawm zel pawh kan tum ang," tiin a sawi.

Inkhel dangah Victor Wembanyama-a point 34 neih hmangin San Antonio Spurs chaun Sacramento Kings lakah 116-96 in hnehna an chang a, point a neih tam bakah rebound vawi 14 lain assist vawi ruk a nei bawk.

Spurs tan hian Julian Champagnie (13 points) leh Chris Paul (12) te an khel ṭha bawk a, inkhel bul ṭantu player panga te chuan point 10 an nei tling vek. Tun season atan vawi nga an chak tling ta a, ṭum ruk an tlawm tawh thung.

Oklahoma City Thunder pawh an match hmasa lamah chesual mah se an tho chhuak leh nghal. Shai Gilgeous-Alexander chuan point 45 teh meuh neiin Jalen Williams (28) leh Luguentz Dort (19) ten an thlawp ṭha bawk a, an khingpui Los Angeles Clippers chu 134-128 in an hneh.

Team hmuhnawm zinga mi Brooklyn Nets pawhin New Orleans Pelicans chu 107-105 in an hneh a, Houston Rockets pawhin harsatna lian tham tawk loin Washington Wizards chu 107-92 in an hneh ve bawk.