Ligue 1 France a roreltu Paris St-Germain

Paris St-Germain-in Montpellier 2-1 in an hneh a, a zawna a vawithum nan Paris St-Germain chuan French Ligue 1 champion nomawi an chawi.

Inrinni zan inkhelah PSG hnaih bertu Lyon chuan Bordeaux hneh zo loin sikhat ve ve khungin an inhneh tawk avangin PSG an umpha thei tawh lo. Match khat khelh hmabak la awm chungin PSG hian point 80 hmuin champion nomawi an chawi a ni.

PSG hi kum 1985-86 leh 1993-94 khan Ligue 1 champion an lo nih tawh a, an reh vang vang hnuah 2012-13, 2013-14 leh 2014-15 ah a zawnin vawi tum an champion.

Tun season-ah PSG hi an khel ṭha tluang viau a league match 37 an khel tawh aṭangin vawi 23 hnehna changin vawi thum chiah an tlawm a, vawi 11 chu an khingpuite nen an inhnehtawk. An champion theih nan hian goal 80 an khung a, goal 34 chauh an chhuah thung.

Inrinni zan inkhelah hian an champion thei a ni tih an hriat lawk avangin PSG an phur a, inkhelh ṭan aṭangin an hlauhawm nghal. France midfielder Blaise Matuidi chuan minute 17 lekah an hmahruaina goal a khung bakah Argentina forward Ezequiel Lavezzi chuan minute 25-naah goal hnihna a khung leh bawk. Montpellier forward Anthony Mounier chuan minute 40-ah goal khat khung ve mah se PSG tlar hnung an su hawng nawn tawh lo.

Thla hmasa khan PSG hian Bastia chu 4-0 a hnehin Coupe de la Ligue champion nomawi an lo chawi tawh a, tunah Ligue 1 nomawi an chawi leh ta. May 30 khian Coupe de France final-ah Auxerre an la hmachhawn leh dawn a, hetah hian an chak leh a nih chuan France club zingah kum khata champion nomawi pathum chawi vek thei hmasa ber an ni ang.

Champion thukhawchang

Paris Saint-Germain coach Laurent Blanc chuan, "Kan boruak a ṭhain a nuam ngei mai. Ka thawhpui leh player zawng zawngte chunagah lawmthu ka sawi e. Tun dinhmun kan thlen theih nan hian kan thawkrim tlang em em a, kan thawhrim rah kan seng mek a ni. Player ten khelmuala hnehna an chang lai han hmuh aia nuam hi a tam lo a, champion kan lawm lai hmuh phei hi chu manager ka nih angin a aia nuam zawk a awm lo," tiin a hlim thu a sawi.

PSG president Nasser Al Khelaifi chuan, "A zawna vawi thum champion nomawi han chawi chu a ropui ngei mai. Kuminah kan khel ṭha zual a, nomawi pahnih kan chawi tawh bakah a dang pakhat chawi theih kan la ni cheu bawk. Kan tum ber chu a tam thei ang bera champion a nih miau avangin Coupe de France nomawi pawh chawi leh ngei kan tum ruh hle ang," tiin a sawi.

Champions League khel tum dang

Champion PSG-in kum tharah Champions League an khel dawn chiang a, pahnihna Lyon pawhin point 72 an hmu tawhin midangin an umpha thei tawh lo. Pathumna Monaco hian point 68 hmu tawhin an dinhmun a ṭha tawh viau a mah se an hnuai chiahah hian point 66 hmu mek Marseille leh St-Etienne an awm avangin match hnuhnung ber an khelh tur hi a pawimawh hle ang. Anni pathum hian Champions League khel turin beiseina an la nei vek a ni.

Ligue 1 Table (Top 4)

# Team GP W D L GF GA GD PTS

1 Paris SG 37 23 11 3 80 34 46 80

2 Lyon 37 21 9 7 71 33 38 72

3 Monaco 37 19 11 7 50 26 24 68

4 Marseille 37 20 6 11 73 42 31 66