Ramhlun North an champion

Inrinni khan Chawlh­hmun Basketball Court-ah All Mizoram Inter Veng Basketball Tournament final khelh a ni a, Ramhlun North-in Dawrpui Vengthar 73-61 a hnehin an champion. Third Place zawnnaah Republic Veng-in 83-78 a Zarkawt hnehin pathumna an ni.

Chawlhhmun Basket­ball Club buatsaih veng-veng inelnaah hian team 40 an tel a, Mizoram Super League zawha basketball inelna neih hmasak ber a nih avangin ngaihhlut a hlawh hle.

Final-ah team pahnih an inhneh tawk a, Khatla TBL champion puitu coach H. Laldinsanga enkawl Ramhlun North hun tawp lamah an dang­lam a, hun tawp meuh chuan point 12-in an fal.

Ramhlun North tan Mission Veng Vikings guard Vanlalnunpuia Varte a khel ṭha a, Puipuia hian point 18 zet a lut a, Most Valuable Player-a thlan a ni. MSL-a che ṭha Mapuia Zote leh Michael F-a te pawh champion-na kawngah an pawimawh hle.

Dawrpui Vengthar tan MSL player Vanlal­muana, Dennis Lalmuan­puia, Lalrinzuala leh Lal­nunpuia te khel ṭha mah se champion nomawi an hlawhchhuak zo lo.