Beisei phak lo Nadal

Spanish Rafael Nadal hi world ranking-ah pasarihnaah a tla thla a, a inkhelh thiamna leh a ropuina ṭhin clay court-ah ngei pawh beisei angin a khel thei tawh lo.

May 24 a ṭan tawh tur French Open-ah pawh beisei a phak loh ringtu an tam ta hle. Nadal hian Italian Open-ah Stan Wawrinka chu 7-6 6-2 a hneh loin a tla a ni.

Clay court-a a chet ṭhat theih em avanga 'Clay court lalpa' tia hming lem an vuah Nadal hian kum 2006 leh 2010 khan clay court-ah bik hneh loh a tawngin season a khar thei. Kum 2010-2013 khan clay-ah vawi 127 inkhelin vawi li chiah chak loh a nei bawk. Hliam leh harsatna neuh neuh vangin nikum khan a inkhel tam thei lo a match 25 chauh khelin vawi 22 chu hnehna a chang thei tho. Mahse, kuminah erawh Nadal a che chhe takzet a, vawi 17 a inlan tawh aṭangin vawi nga ngawt a tlawm tawh a ni.

Hetihlai hian Novak Djokovic leh Roger Federer te chu hmalam panin an kal zel. Italian Open champion lai Djokovic hian semifinal-ah David Ferrer chu 6-4, 6-4 a hnehin final a lut. Pathianni zan khan final-ah Federer nen an in hmachhawna, result erawh kan hre hman lo.

Final lut turin Federer hian 6-4 6-2 in Stan Wawrinka chu a hneh a ni. Hmeichhe final-ah Spanish seeded 10 na Carla Suarez Navarro leh Maria Sharapova an inhmachhawn bawk.