Hull City-in tlak an hnaih
Tottenham Hotspurs-in Nacer Chadli leh Danny Rose te goal hmangin Hull City an hneh a, Hull tan season thara Premier League khel turin season tawp inkhelah Manchester United an hneh ngei ngai a ngai ta.
Inrinni zanah Leicester City-in Stadium of Light-ah Sunderland lakah point khat an sual chhuak a, Aston Villa-in St Mary's Stadium-ah goal ruk zetin chhuain Southampton lakah 6-1 in an tlawm. White Hart Lane-ah Hull-in point an hlawhchhuah ve loh avangin Leicester leh Villa hi season thara Premier League khel turin an him.
Relegate tawh Queens Park Rangers-in an mual Loftus Road-a an game hnuhnung berah Newcastle 2-1 in an hneh. QPR leh Burnley an tla chiang tawh a; Hull, Newcastle leh Sunderland te tla thei dinhmunah an la ding.
Hattrick rang
Southampton forward Sadio Mane-a'n minute hnih leh second 56 chhungin hattrick a siam a, Premier League history-a hattrick rang ber a ni a, Robbie Fowler-a record kum 21 chhung awm tawh chu a khum. Mane bakah hian Saints tan Shane Long-a'n goal hnih a khung a, Graziano Pelle-a'n goal khat a khung ve bawk. Southampton-in Villa 6-1 in an hneh a, mikhual team tana goal awmchhun khungtu Christian Benteke-a'n tun season-ah goal 15 a khung ta bawk.
Southampton manager Ronald Koeman chuan, "Khatiang zat goal kan khung kha ka beisei lo a, chuthihrualin kan khelmuala kan match hnuhnung ber a nih avangin season tluana min ṭantu kan fan-te chuan result ṭha tak hmuh kha an phu hlein ka hria," tiin a sawi.
Aston Villa manager Tim Sherwood chuan, "Villa kan enkawl tirhin Championship aṭanga tla thei dinhmunah kan ding hman a, tunah chuan Premier League kan la khel chhunzawm zel dawn tih a chiang ta. Tuna kan result hi chu kan theihngilh a ṭul a ni," a ti.
Newcastle an buai
Match riat chak loh hnuah Newcastle-in West Brom an draw a, chumi hnua an match hmasa berah QPR an hneh lo. QPR hian kum 1995 hnua a vawi khatna atan Newcastle an hneh a, QPR tan Matt Phillips leh Leroy Fer ten goal an khung. Newcastle hian Emmanuel Riviere hmangin an khung hmasa a, Riviere hian minute 1084-naah club tana a goal hmasa ber a khung.
Newcastle coach John Carver chuan, "Second half minute 10 kan khelh dan kha hriatthiam theih a ni lo (Goal hnih an chhuah). Chak tumin kan khel a, chak zo ta lo mah ila kan lawmna chu Hull City chak loh kha a ni. Match hnuhnung ber kan khelh hmain media lamin min bei nasa dawn a, chumi pressure chu kan dawl zawh a ngai a ni," tiin a sawi.
Relegation Battle
Hull City-in match hnuhnung berah Manchester United an mikhual dawn a, point thum an hlawhchhuak a nih pawhin Sunderland leh Newcastle ten point an hlawhchhuah hrim hrim chuan season tharah Championship an khelh a ṭul tho ang.
Chutihrualin tunhnaia Newcastle chet dan leh Sunderland khelh hmabak thlirin Hull hi la vannei thei an ni. Newcastle hian an game hnuhnung berah West Ham United an mikhual dawn a, Sunderland hian Arsenal leh Chelsea an la hmachhawn dawn bawk.
Inkhel Results
Southampton 6 - 1 Aston Villa
Burnley 0 - 0 Stoke City
QPR 2 - 1 Newcastle United
Sunderland 0 - 0 Leicester City
Tottenham Hotspur 2 - 0 Hull City
West Ham United 1 - 2 Everton
Liverpool 1 - 3 Crystal Palace
Team Dinhmun
1 Chelsea 36 25 9 2 70 28 42 84
2 Manchester City 36 22 7 7 77 36 41 73
3 Arsenal 35 21 7 7 66 34 32 70
4 Manchester United 36 20 8 8 61 36 25 68
5 Liverpool 37 18 8 11 51 42 9 62
6 Tottenham Hotspur 37 18 7 12 57 53 4 61
7 Southampton 37 18 6 13 54 31 23 60
8 Swansea City 36 16 8 12 44 44 0 56
9 Stoke City 37 14 9 14 42 44 -2 51
10 Everton 37 12 11 14 48 49 -1 47
11 West Ham 37 12 11 14 44 45 -1 47
12 Crystal Palace 37 12 9 16 46 51 -5 45
13 West Brom 36 10 11 15 34 47 -13 41
14 Leicester 37 10 8 19 41 54 -13 38
15 Aston Villa 37 10 8 19 31 56 -25 38
16 Sunderland 36 7 16 13 30 50 -20 37
17 Newcastle 37 9 9 19 38 63 -25 36
18 Hull City 37 8 10 19 33 51 -18 34
19 Burnley 37 6 12 19 27 53 -26 30
20 QPR 37 8 6 23 41 68 -27 30