John Terry hi keimah vangin Chelsea-ah a la cham - Mourinho

Chelsea manager Jose Mourinho chuan amah chu awm lo se Chelsea captain John Terry chu London club-ah a cham a rin tawh loh thu a sawi chhuak.

Tun season Premier League a Chelsea cham­pion puitu manager chuan, "Terry pawh hian ka thusawi hi a pawm khawp ang. Kei awm lo ila chuan John Terry hi Chelsea-ah hian a awm tawh kher lo ang. Chutih ruala ka hriat chian em em chu Terry hi ka team-ah nei ta lo ila, Premier League nomawi hi ka chawi tawh lo ang," tiin tun season Premier League-a an match zawng zawng khel kim vektu Terry chu a fak.

Kum 34-a upa Chelsea defender hi Jose Mourinho-a'n Chelsea a chhuahsan hnu lawk khan Roberto Di Matteo leh Rafael Benitez te hnuaiah a khel pha mang lo. Mahse, kum 2013-a Mourinho-a'n Chelsea a zawm leh hnu in John Terry-a'n hmun pawimawh a chang chhunzawm lehnghal a, tun season Premier League nomawi an chawi theih nan a thawh hlawk hle. Kumin March thla khan Terry hian contract thar ziakin kum 2016 nipui thleng Stamford Bridge-ah a cham dawn.

Chelsea a enkawl hmasak a Premier League nomawi vawi hnih lai chawi puitu Mourinho chuan, "Ka hmuh dan chuan Terry kha a buai hman a, a thiamna tak tak kha a hloh tawhah ka ngai a ni. Kum hnih chhung vel kha chu inkhel mang lo in hun a hmang a, a thiamna ngaiah khan a kir leh theih ka beisei tawh lo. Zep loh ah chuan he hmunah hian manager dang rawn kal se chuan Terry hian hmun a chang tawh lo ang, inkhel tlem tak chung chuan contract thar hi an zawrh miah lo bawk ang," tiin Terry chu Chelsea a chhuahsan lai khan a tlakchhiat hman thu a sawi.

Kum 52-a upa Portu­guese manager chuan, "Terry hian hma a sawn leh theih beiseina sang tak ka nei a, player ṭha tak a nih leh theih kha ka ring tlat. A tawpah chuan ka beiseina ti hlawhtlingin beisei phak baka ṭha in a rawn khel leh a, season ropui leh chhuanawm tak a hmang a ni," tiin Terry-a chunga rinna a nghah tlatna chuan player ṭha zawkah a chherchhuah leh thu a sawi.

Champion chiang tawh Chelsea hian zanin dar 12:30-ah West Brom chu an khelmual The Hawthorns-ah an lenchilh dawn a, May 24-ah tun season Premier League-a an game hnuhnung ber khelin an khelmual Stamford Bridge-ah Sunderland an lo mikhual dawn thung.