Min ngainat leh nat loh chu in thu thu a ni - Nigel Pearson

Inrinni zanah Sunder­land nen goal inpe lo in an inhnehtawk a, season tharah Leicester City-in Premier League an khel zel dawn. An manager Nigel Pearson pawh a ṭawng pawr khawp mai a, "Min ngaina emaw ngaina lo emaw-in thu thu a ni e," a ti.

February a Leicester-in an ban mai tur anga an sawi Pearson chuan, "Manager rinhlelhna leh rintawk lohna hi chu khawi hmunah pawh a awm vek. Dinhmun hlauhawmah he club hi ka lo dah tawh a ni maithei. Mahse, ka duhdan in ka thawk a, chu chu i duh lo anih chuan i thu thu a ni,"a ti.

Leicester City hi hun rei tak chhung chu Premier League mawngphahah an awm reng a, season chawhnu lamah match riat aṭangin point 19 an hlawhchhuak. An match hmasa 29-ah heti zat tho hi an hlawhchhuak a, tunah chuan an him ta.