Serie A Juventus-in an la duhtawk lo, an chak zel

Italian Seria A champion niomawi chawi tawh mah se Juventus-in an la duhtawk mai lo a, Inrinni zan khan an khingpui Inter Milan chu chu 2-1 a hnehin table-ah point 83 zet an hmu ta.

Juventus hian tun season-ah Serie A champion nomawi an chawi tawh bakah Champions League leh Italian Cup final an lut ve ve bawk. Champions League final-ah Barcelona an hmachhawn anga, Italian Cup-ah Lazio an hmachhawn thung ang. Champion nomawi pathum chawi turin an dinhmun a ṭha tawh hle.

Champions League final an luh tawh avangin Juve hian an player ṭha te Inrrinni zan hian an hahchawlh tir nual a, Gianluigi Buffon, Carlos Tevez, Arturo Vidal leh Andrea Pirlo te chu squad-ah pawh telh an ni lo.

San Siro inkhelah hian Massimo Allegri hian Real Madrid hnehtu aṭangin player pali chauh a chhawr nawn. Anmahni khelmuala khel an ni bawk a Inter-in inkhel bul an ṭan ṭha zawk a, minute 9 na lek a Marcelo Brozovic corner pet Juve tlarhnung ten an pet chhuah mai loh avangin Mauro Icardi chuan an hmahruaina goal a khung.

First half zawh hma hretin Manchester United centre-back hlui Nemanja Vidic chuan box chhungah Alessandro Matri a tihtluk avangin penalty a chawi. Penalty pet tur hian Claudio Marchisio a rawn dingchhuak a, a hlah lo. Sikhat ve ve thuninchawlh lawk an hmang.

Second half-ah Icardi leh Xherdan Shaqiri te hmangin Inter Milan hian goal khungna hun ṭha nei mah se goal zawnah an hriam tawk lo. Hun tawp hma minute sarih chauh a awm tawh tihah Alvaro Morata chuan box pawn aṭangin mawi takin an chakna goal a pet lut.

Inkhel dangah Lazio-in season thar a Champions League khelh an beiseina an ti nung zel a, an khingpui Sampdoria chu sikhat faia hnehin table-ah pahnihnaah an inhlangkai. Pathianni zan inkhelah Roma hian an khingpui Udinese an hneh anih chuan Lazio hi pathumnaah an tla thla leh rih ang.