Danny Ings a chhuak dawn

Premier League aṭanga tla hlim Burnley manager Sean Dyche chuan season tharah an striker chhuanvawr Danny Ings chuan club dang a pan tur thu a tichiang.

Kum 22-a upa Ings hian tun season Premier League-ah goal 10 khung­in a team chhanhim zo lo mah se Premier league club Liverpool leh David Moyes-a enkawl Real So­cie­dad te'n an hmu tai hle.

Inrinni zana Stoke City nen goal inpe loa an inhnehtawk zawh hnu lawkin Dyche chuan, "Nitin maia Ings hmasawnna hmuh hi a nuam takzet. Mahse, kan tan a khelh chhunzawm zel erawh a beiseiawm tawh lo a ni. Tunhnaiah Ings leh a agent te'n club thar zawm an duh thu an tichiang tawh a, player-in contract thar ziah a duh loh chuan a thu thu a ni a, a kawng kan dal thei lo," a ti.

August 2011-a pound maktaduai khata Bournemouth aṭanga Burnley zawmtu hi tun nipui hian Burnley-a a contract neihlai hi a tawp tawh dawn. Kum 24 ala tlin loh avangin a contract tawp tawh mah se amah duhtu club chuan pawisa engemawzat an chawi a ngai dawn tho a ni.