Bagan-in Odafa Okolie an ngam lo

Inrinni tlai khan Jawa­harlal Nehru stadium, Goa-ah Sporting Clube de Goa-in Odafa Okokie goal hnih hmangin Mohun Bagan 2-1 in an hneh.

Inkhel result avang han I League season tawp boruak a ngaihnawm sawt a, khelh zat inangah hmahruaitu Mohun Bagan leh champion lai Bengaluru point hmuh zat a intluk chiah.

Sporting coach Mateus Costa-a'n Bharat FC an hneh ṭuma starting eleven aṭangin pakhat chiah a ti danglam a, hrem vanga khel thei lo Anthony Wolfe aiah Nigerian forward Odafa a luh tir.

First half-a goal a luh loh hnuin minute 70-na­ah Odafa-a'n a club hlui lamah a khung a, minute thum hnu lekah Japanese midfielder Yusa Katsumi hmangin Bagan-in an sut. Chak ngei tumin Kolkata club-in J. Lalpekhlua an luh tir a, amaherawhchu Mizo tlangval aiin Nigerian forward a langsar a, I League history-a hattrick siam tam ber Odafa hian minute 87-naah chakna goal a khung.

Sporting hian point thum an hlawhchhuah avang­in relegation zone an chhuah­san a, I League aṭang hian team pakhat an tla ang.

Bagan hian Nilaini khian Royal Wahingdoh an hmachhawn anga, Inrinni­ah Sporting de Goa an mi­khual ang a, May 31, Pa­thian­ni khian an match hnu­hnung berah Bengaluru an hmachhawn ang.