Anfield-a Steven Gerrard hun a tawp ta
Anfield-ah mipui sing rual an pungkhawm a, 'You'll never walk alone' tih hla sa chungin ring takin an zai dual dual a, hmun tinah Liverpool legend Steven Gerrard-a thlalak leh banner hmuh tur a awm.
Liverpool in a fapa rangkachak, kum 17 chhung zet hmun dang hawi loa a vanglai hun ṭha zawng zawng club tana hlan zotu Steven Gerrard-a'n thlah vang a ni. Inrinni zan bak kha Anfield-ah Liverpool kawr ha chungin Captain Fantastic a inlan tawh dawn lo, season tharah chuan LA Ggalaxy jersey ha chungin MLS lamah a inlan tawh ang.
Mipui zinga banner pakhat intar khan Liverpool fan-te'n an captain an dah sanzia leh ngaihsan zia a tarlang chiang ber mai awm e, "All the way from Kuwait to say goodbye to Stevie"
Mi ropui Steven Gerrard
A vanglaiin khawvela club ropui ber berin an hnena khel turin an sawm a, a hnar fai vek. 2005 Champions League-a ropui taka Liverpool a champion pui zawh hnu lawkin Real Madrid-in man to taka lei an tum a, an hmelma Barcelona aṭang meuh pawha Luis Figo lei theitu club hian Stevie G an lei chhuak zo lo.
Liverpool midfielder atchilhtu langsar zinga mi chu Chelsea manager Jose Mourinho a ni. Chelsea-ah lakluh a tum a, a hlawhchham. Jose bawk hian Inter Milan-ah lakluh a tum a, a hlawhchham leh a; Real Madrid a enkawl hnu pawhin a lalut thei chuang lo. AC Milan-in 'Kaka' te ho an kawl lai, an club vanglai takin lakluh an tum a, an hlawhchham.
Kum 2012-a Bayern boss hlui Jupp Heynckes-a'n Bayern Munich zawm tura a sawm lai khan Stevie hian lo hnar lo se chu, 2013-a Bayern Munich treble champion zingah pawh khan a tel ang.
Stevie hian amah sawmtu club ropui tak takte kha hnar lo se chu Premier League medal a awrh anga, Champions League medal pawh pakhat aia tam a kawl ang. Mahse, chung zawng zawng aia Stevie-a'n a ngaih ropui zawk chu 'Liverpool' a ni. Amah ngeiin, "Liverpool tana ka hun tawn zawng zawngte kha engmahin ka thleng phal lo," a tih avangin Liverpool fan tawh phawt tan chuan Gerrard hi ngaihsan loh rual a ni lo a, Anfield-a an thlahna zawng zawng kha a phu hle.
Player puite ngaihsan
2005 Champions League-a Liverpool an champion ṭuma player pawimawh ber pawl John Arne Riise chuan, "Gerrard hi player satliah a ni mai lo a, ka inkhelhpui tawh zawng zawnga thiam ber a ni. Liverpool-in player a neih tawh zawng zawngah Stevie hi a ropui ber lawr lak a, kum sarih chhung zet kan khel ho thei kha ka inchhuang hle. A kiangah ngei Champions League nomawi ka chawi a, mahse hei pawh hi ama min hlawhchhuah sak a ni," tiin a dah sang hle.
Liverpool striker inhliam mek Daniel Sturridge chuan, "Liverpool kawr ha tawh player zingah ani aia ropui an awm lo. A hun hnuhnunga ka tel ve thei lo hi pawi ka ti takzet a ni. He hmun ka lo kala min titlangnel hmasatu leh nasa taka min puitu a ni a, football-a ka zir belh ngai tam tak min hrilhtu a ni," a ti.
Newcastle United leh England player ropui ber pawl Alan Shearer chuan, "Player ṭha tak an awm a, chumi chungah chuan player ropui an awm. Stevie hi player ropui a ni. Kan hunlaia English player ropui ber pawl hnenah hian ka duhsakna ka hlan e,"a ti.
Stoke City goalkeeper Asmir Begovic chuan, "Liverpool tan zin kawng ropui tak a zawh avangin Stevie hi ka lawmpui a ni. Ka ngaidanah Premier League player zingah ani aia ropui an awm lo,"a ti.
Liverpool hmelma kumhlun Everton player hlui Tim Cahill chuan, "Derby khelh changa Steven Gerrard kan hmachhawn thei ṭhin kha ka inchhuang hle a ni. Everton ṭantu ni mah ila Stevie hi ka zah em em a, a club hmangaih dan kha khaikhin rual a ni lo. A tel lo chuan Liverpool hian ngai a awh leh tawh lo ang," tiin Captain Fantastic chu a ngaihsanzia a sawi.
Atletico Madrid stiker Fernando Torres chuan, "Team khata kan khel ho thei kha ka inchhuang a; captain, kawng engkimah i chungah ka lawm takzet a ni," a ti.
Barcelona striker ni ta Luis Suarez chuan, "Football tana i thiltih zawng zawng leh Anfield-a ka chunga i ṭhatna zawng zawng avang khan ka lawm e," tiin Liverpool-a a khelhpui ṭhin chu a thlah.
Vawiin hi ka hre reng tawh ang - Steven Gerrard
Anfield-a amah thlahna hunah Liverpool captain chuan, "A lunglenthlak takzet a, hetiang taka ropui hian Liverpool hian min thlah ang tih hi ka lo suangtuah phak ngai lo. He hmuna kum 17 chhung hun ka lo hman tawhte kha ka theihnghilh tawh ngai lo ang. Dik taka sawi chuan vawiin lo thleng tur hi ka huphurh lawk em em a, min ṭantu rinawm tak takte hmaa ka inkhel tawh lo tur hian min tilungngai a, he hmun hi ka ngai dawn hle a ni,"a ti.
Liverpool fapa rangkachak chuan Liverpool enkawl chungchang sawiin, "Club ropui leh lian a ni a, he hmuna coach ni tur chuan coach ṭha tak i nih a ngai a ni. Coaching lama inhman hi chu ka chak a, kum engemawzat chu ka la mamawh dawn a ni," tiin Liverpool enkawl tur chuan hun a duh tur thu a sawi.
Liverpool manager Brendan Rodgers chuan, "Steven hi player ropui tak, thlak mai mai theih loh a ni. He hmuna Stevie hmun ruak hnawhkhat tur chuan a thiltih tawh zawng zawngte kha en ula, a theih loh a ni. A phu ang ngeiin ropui taka thlah liam a ni a, a tawp thlengin a theihna zawng zawng a pe a ni," a ti.
Crystal Palace manager Alan Pardew chuan, "Liverpool mai ni lo, England beiseina zawng zawng phurtu a nih chang pawh a awm ṭhin. Steven-te ang player ropui kan hmu thei hi lawm tur kan ni," tiin a dah sang hle.
Inrinni zan khan Liverpool captain Steven Gerrard-a'n Anfield-a Liverpool tana a match hnuhnung ber a khel a, 1-3 in an mikhual team Crystal Palace lakah an tlawm. Minute 26-naah Adam Lallana chuan Liverpool tan goal hmahruai khung mah se Jason Puncheon, Wilfried Zaha leh Glenn Murray-te'n Crystal Palace tan an khung zui a, Stevie G-a Anfield match hnuhnung berah Liverpool an tlawm.