Bawngkawn ral a lian

Zirtawpni zan khan Bawng­kawnin CT Group Cup CYMA Inter Branch Football Tournament 2015 semi final an lut. Bawngkawn hian Armed Veng South chu penalty shootout-ah 4-2 in an hneh a, hun pangngaiah 1-1 in an inhnehtawk a ni.

Veng leh veng football inelna ngaihhlut YMA Football-ah champion lai Armed Veng, Bawngkawn, Dinthar leh Lengpui chiah an dam ta.

Quarterfinal match hnuhnung berah team pahnih an inveng tawn a, inkhel thununtu zawk nih inchuhin an inbei nasa hle. Player nei ṭha Bawngkawn an chungnung thei bik lo a, inbuatsaihna nei ṭha Armed Veng 'S' lamin goal khungna hun ṭha an insiam thei bik lo.

Second half-ah Armed Veng 'S' in midfield an thunun deuh zawk a, hetih lai hian Bawngkawn tlar hmate an thawkrimin an hlauhawm. Minute 48-a Bawngkawn corner hmuh aṭangin Chanmari FC winger H. Lalmuankima'n goal ropui a khung. Bawngkawnin 1-0 in hma an hruai.

Injury time-ah Bawngkawn keeper Lalnunenga chetsual vangin Armed Veng 'S' lamin Lal­rammuanpuia hmangin penalty aṭangin an sut a; Nunenga hi hnawhchhuah a nih vangin a aiah MC Lalneihsanga chu luhtir a ni.

Penaltyshootout-ah MPL3-a Beth­lehem VT keeper MC-a a che ṭha zui nghal a, semifinal-ah Bawngkawn a hruai thleng.