Quarterfinal-ah Mizoram chak

National Sub Junior Championship for Girls-ah Mizoramin first round-ah Tripura hnehin quarterfinal an lut a; Inrinnia quarterfinal match hmasa berah Elizabeth Vanlalmawii hattrick hmangin Odisha 3-0 in an hneh.

Quarterfinal-ah hian team pariat chu group hniha ṭhendarh an ni. Mizoram group-ah hian Odisha, Bihar leh Chandigarh-te an awm a; group pakhat zawkah Manipur, Maharashtra, Haryana leh Jharkhand-te awmin, a sang pahnihin semifinal an lut ang.

Mizoram hian Odisha an khelh ṭumin inkhel an thunun a, goal thum khungtu Farkawn tleirawl Elizabeth-i hian Tripura an hneh ṭumin hattrick a siam tawh a, tun inelnaah goal sarih a khung tawh.

Vawiin tlai dar 3:30 hian Mizoram leh Chandi­garh an inkhel anga, group match hnuhnung ber hi Nilaini zing dar 7:00-ah Bi­har nen an inkhel leh ang.

Mizoram coach Lal­nunsanga chuan, "Khua a lum em em a, mah se mak deuh chu kan inkhelh dawn velah hian ni a duai a, khua a rawn dur khup zel a, kan vannei ṭhin khawp mai. Kan group-ah hian Bihar hi an khawng ṭha a, Pathian zarah kan tlang theih ngei ka beisei," tiin a sawi.