I Day Football 2016 Zo United-in Dinthar an ngam

MPL4-ah Zo United-in sulhnu nei ṭha zawk Din-thar FC ṭum hnih an hneh a, chung zingah chuan semi-final lut tura 5-1 a an sawp pawh a tel. Inrinni chhun khan Lammualah club pa-hnih hi an intawng leh a, Vanlalhmangaiha goal hmang-in Zo United bawk an chak.

I Day Football 2016-ah Zo United-in hneh loh an la tawn loh bakah goal la chhuah loin Group B-ah hma an hruai mek.

Chutihrualin Shillong Lajong-in an match hmasa berah point thum an hmu nghal a, Dinthar FC-in point thum an hmuh tawh avang leh Ramhlun North-in hneh loh an la tawn loh avangin semifinal lut tur hriam thiam a la har hle.

Goal khat a tawk

Minute 32-naah Zo United winger Laldinliana Varte corner pet chu Lalṭhazuala'n (Puitea) tauhin Dinthar defen-der-in dang mah se a per chu Hmangaiha'n chiang zetin a pet goal. Electric Veng tlangval goal khung hi chakna goal a ni zui a, hun rei tak inkhela an chungnun avangin Zo United-in chak an phu hrim hrim.

Chutihrualin Dinthar FC tan Lalbiaknia'n first half-ah keeper chauh a hmachhawn hnuah goal zawnah a pet thei lo a, second half-ah Lalruatpuia'n goal ban a pet per bawk. Hun tawp lam boruak a san avangin Zo United coach Vanlalrova chu hnawhchhuah a ni.

Eng nge an sawi?

Dinthar FC coach Lal-chhuan-awma chuan, "Ka player-te demna tur ka hre lo. Theihtawp kan chhuah a, insiamṭhatna tur erawh a awm," tiin Vanglaini palai a hrilh.

Zo United coach Vanlalrova chuan, "Technical area chin kha a fiah tawk lo a, ka ṭan tawh avangin ka lo pel thui deuh a ni. Ṭawngkam mawi lo phei chu ka hmang lo a, ka lo ṭang deuh a ni. Kan khelh dan bikah chuan hmasawnna hmuh tur a awm zel avangin ka lawm a, kan rawlthar player-te pawh senior zingah an rintlak a, kan ṭha chho zel ang," tiin a sawi.