A hmalam hunah Milner a buai

Liverpool midfielder James Milner chuan England team-a a hmalam hun chungchangah boss thar Sam Allardyce titi pui a tum thu a sawi a, England tan bench-a
ṭhu tur ringawta zin reng a tum tawh loh thu a sawi chhuak.

England tana vawi 61 inlan tawh Milner hi Euro 2016 khelh zawh takah khan England squad-ah telh a ni a, mah se Euro match li an khelhah khelmual chhungah minute thum bak hun a hmang lo.

Kum 30-a upa Milner chuan, "Fa la naupang tak pahnih ka nei a, inkhelhna hmun chang phak lo tura anni pahnih zin san reng hi ka duh tawh lo. England tan tournament lian paliah ka inlan tawh a, mah se eng ka nih phah lo," a ti.

Milner hian England tan Euro 2016 bakah World Cup 2010, 2014 leh Euro 2012 a lo khel tawh a, inelna lianthamah ram tan match sarih chiah inkhel bul a la
ṭan thung. France-a Euro khel England squad-ah khan a aia ram tana khel hnem erawh captain Wayne Rooney (115) leh Joe Hart (63) te chiah an ni.

Kum 2009-a England tana a match hmasa ber kheltu chuan sawi chhunzawmin, "Player naupang tak tak leh ṭha zawk an rawn chhuak zel a, khel phak si loa an kawng daltu nih reng pawh hi awmze nei lo a ni. England boss atan Sam ruat a ni hi ka lawm takzet a, ani nen hi chuan tlang tak leh zep nei loin kan inkawm thei dawn a, chu chu ka duh ber pawh a ni," tiin a hmalam hun tih chian vat a tum.