Rio Olympic atan Durant a inpeih

United States Olympic team zinga hming langsar berte zinga mi Kevin Durant chuan Rio Olympic hmachhawn tura a inpeih tawh thu a sawi chhuak.

Kum 27-a upa Durant hi basket-ball team zinga mi niin an ram inngahna tur pakhat a ni ang. Season hmasa khan Durant hian Oklahoma City Thunder tan khelin chawlhrualin match tinah point 28.2 a socre ziah bakah rebound vawi 8.2 lain assist vawi 5 a nei ziah bawk. American forward hian July thla tir khan kum hnih chhung cham turin Golden State Warriors a zawm.

Season tharah chuan Durant hi a zawna season hnih chhung NBA MVP ni tawh Stephen Curry nen an inkawp tawh dawn, hei hi Golden State ṭantute tan thu lawmawm a nih laiin Oklahoma City fan-te tan chuan chanchin lawmawm loh leh thinrimna tur mai a ni thung a, an player hlui hi Thunder ṭantuten an sawisel nasa hle nghe nghe.

Olympic thlirin Durant chuan, "Thil chi hrang hrang ri vel a tam hle a, a pawimawh ber zawk chu ṭha taka basketball khelh chhunzawm a ni a, chumi ka tih theih nana hmathlir ka neih ṭhat a pawimawh. Tunah chuan sawiselna leh deusawhna thute theihnghilhin Olympic kan ngaihtuah a hun tawh - Rio pan tur hian ka inpeih tawh a ni," a ti.

Durant chuan sawi chhun-zawm-in, "Basketball-ah chuan beisei loh result a thleng thei a, tunah hian kan nghawngah medal kan la awrh miau loh avangin champion kan la ni lo. US tana gold medal la ngei tura inpuahchah hi kan tih tur pawimawh chu a ni," a ti a, senior player ṭhenkhat inlan dawn lo mah se tawn hriat nei an la ngah tho avangin beiseina a neih san thu a sawi tel bawk.

2012 London Olympic basket-ball champion team hian gold an lak ṭuma player pawimawh LeBron James, Curry, Chris Paul, Anthony Davis, James Harden leh Russell Westrbook te an hruai tel lo nachungin kuminah hian champion tura rinkai an la ni tho.