I Day Football 2016 Sawmfela goal leh Chanmari an ropui

Chanmari FC forward Malsawmfela'n Chhinga Veng FC lamah goal ropui a khung a, Inrinni tlaia goal hi Lammuala goal lut tawha ropui ber pawl a tling ngei ang!

I Day Football 2016-ah Chan-mari FC-in Lalruatfela Zote leh Sawmfela te goal hmangin Chhinga Veng FC chu 2-0 in an hneh a, Group A-ah point ruk hmuin hmahruaitu an ni.

Hetihlai hian MPL kaithar Chhinga Veng erawhin vawi hnih khelhah point khat chiah an hlawh chhuah avangin semifinal lut tur chuan August 4, Ningania Aizawl FC an hmachhawn hunah chak loh a thiang tawh lo.

An mawi e

Chanmari FC-in R. Malsawm-tluanga an chuh nat chhan chu khelmualah a lang a, field pawna CFC hotute thawhrimna rah a hmuh theih. Chutihrualin coach Lalsangzuala Hmar-in an player neihte chu game mawi khel thei turin a chher hriam a, Chhinga Veng FC lakah Chanmari FC chu kawng tinrengin an chungnung.

Ball semtu MS-a chu CFC game khaikhawmtu ni a; Fela Zote, Sawmfela, Lalmuanzova, Lalrammawia leh Lalrinchhana te chu a tihmuhnawmtu an ni.

Goal venhim tum Chhinga Vengin darkar chanve chuang hret dang thei mah se, "Chanmari FC-in goal an thun ang em?" tih lam ni loin
"Eng tikah nge an thun ang?" tih chu zawhna a ni!

Minute 35-naah player 'class' danglamna a lang a, Sawmfela ke aṭanga ball chhuak fing tak chu Fela Zote-in um lutin Chhinga Veng captain Joseph Lalnunpuia a bum hnuah a pet goal chiang hle. Chanmari FC-in goal an khung hnuah pawh an nawr zel a, attacking football hmuhnawm tak a ni.

Goal ropui

Ropui tih ṭawngkam hman tam luatah goal naran aia chung hret pawh goal ropui tia sawi a ni fo. Chanmari FC forward Sawmfela'n minute 44-naah yard 51 vel aṭangin Chhinga Veng keeper Vanlalawmpuia Ralte a pet khum a, Lammuala goal danglam tak hi goal ropui ngei chu a ni.

Ramhlun South tlangval Sawmfela hian halfway line thlen hmain ball vawi khat a tawk a, Chhinga Veng player pathumin hual mah se ball vawi khat per chhung hian keeper awmna a hriat bakah pet thei nghal turin a insiam rem nghal a, a et goal. A video en tur a awm zui tak avangin Mizoram football chanchinah a dai tawh lo ang. Chhinga Veng defender leh keeper te dem tur an awm lo a, Sawmfela'n a thiamna leh theihna a pholang mai a ni.

Engtin zel?

Second half ṭantirhah Chhinga Veng winger H. Lalmuan-kima corner pet chu Laldinliana ke zawnah a tla fuh a, Armed Veng South tlangval hian goqal ngei ngei tura rin chu hnai tak aṭangin a pet over - hei hi goal ngat se chuan a boruak a danglam thei ang.

Chhinga Vengin an khelh dan 5-4-1 formation aṭanga 4-4-2 an hman hnuah Chanmari FC an chungnung fâl tawh bik lo.

Chanmari tan Sawmfela, Msa leh Rinchhana ten chance ṭha an hlah vek a, hun tawpah Chhinga Vengin goal an khung teuh viau bawk. Winger MK-a thawhrah chu Lalkhawpuimawia'n kawh zetin goal zawnah pet mah se Chan-mari captain Lalrinchhana To-chhawng-in a dan hman avang-in second half-ah goal a lut lo.

Eng nge an sawi?

Chhinga Veng coach Lal-remtluanga chuan, "Inhliam kan ngah avangin khelh tum dan bik kan nei a, kan tifuh tawk lo a ni. Inhliam hi chhuan-lamah hman ka tum lo a, Pathianin kan chunga ro a rel dan kan pawm thiam a ṭul a ni," tiin Vanglaini palai a hrilh.

Chhinga Veng hian MPL-a tawnhriat nei ṭha defender pa-thum vice captain Ronald Zothanzama, K.Lalthlahlova (Patea) leh Lalramfelpuia te chu inhliam vangin an chhawr thei lo. Hei bakah hian Chan-mari West an draw ṭuma goal pawimawh khungtu Paul Ramfangzauva leh star striker MS Dawngliana chu inhliam leh damlohna vangin an inlan thei lo bawk.

Chanmari hneh hi Chhinga Veng chu an ni ngei a, amah-erawhchu MPL kaithar hi an
la kim lo - hei aia ṭha thei an ni.

Chanmari FC coach Lal-sang-zuala Hmar chuan, "Kan khelh dan a lungawi thlak hlein ka hria. Second half-ah tlahniam deuh mah ila Aizawl FC kan khelh ṭum ai chuan hma kan sawn tih a lang a, ka lawm khawp mai. Chutihrualin chance tam tak kan hlah a, rim taka kan thawh chuan hma kan sawn zel hi ka beisei tlat a ni," tiin cheṭha tura thawrim chhoh zel a tum thu a sawi.

Sanga chuan, "Season liam taa BVT ka enkawl ṭum khan MPL ṭantirah player pawimawh Fela Zote, Notea leh Zautea te an inhliam a, I Day Football leh MFA Super Cup ṭha takin khel mah ila MPL-ah ber beisei kan pha lo. Player ṭha dam hnuah erawh kan result a ṭha zui a, MPL4 phase 2-ah khan hneh loh kan tawng lo. Chhinga Veng pawh hi an player inhliamte dam vat turin duhsakna ka hlan e," tiin Chhinga Veng dinhmun a hriatthiam pui thu a sawi.