FIFA secretary-general a inpeih

Football khawvela thuneitu sang ber FIFA secretary-general thar Fatma Samoura chuan kum 20 chuang United Nations tana a lo thawh tawhna chuan tun dinhmun thleng tura a buatsaih thu leh a inpeih thu a sawi.

Hmeichhe zinga FIFA secretary-general dinhmun luah thei hmasa ber chuan, "Khawvel hmun hrang hranga indona thlenna hmun Afghanistan, Liberia, Sierra Leone, East Timor, Kosovo leh Nigeria-ah te hna ka lo thawk tawh a. Kum 20 chuang heng hna harsa tak ka lo thawh tawhte hian vawiina chona hmachhawn tur hian min buatsaih a ni," a ti.

Football lama tawnhriat a neih loh vanga sawisel hlawh Samoura chuan, "Football player lo ni tawh ṭhin nen kum 28 chuang kan innei tawh a, footballer zingah ṭhian ṭha tam tak ka nei bawk," tiin buaina a neih loh thu a sawi.